மோதல்-2 சட்ட மாணவர்கள் கைது

சென்னை: சட்டக் கல்லூரியில் மோதலில் ஈடுபட்டு காயமடைந்து மருத்துவமனையில் சிகிச்சை பெற்று வந்த பாரதி கண்ணன், ஆறுமுகம் ஆகிய 2 மாணவர்கள் கைது செய்யப்பட்டுள்ளனர்.

சென்னை அம்பேத்கார் சட்டக் கல்லூரியில் கடந்த மாதம் இரு தரப்பு மாணவர்களுக்கிடையே பெரும் ஜாதி மோதல் நடந்தது.

இந்த சம்பவம் தொடர்பாக 43 மாணவர்கள் கைது செய்யப்பட்டனர்.

மோதலில் காயமடைந்த பாரதி கண்ணன், ஆறுமுகம், அய்யாத்துரை ஆகிய மாணவர்கள் அரசு மருத்துவமனையில் சிகிச்சை பெற்று வந்தனர்.

இந் நிலையில் நேற்று மாலை பாரதிகண்ணன், ஆறுமுகம் ஆகிய இருவரையும் போலீசார் கைது செய்தனர். இவர்கள் மீது 307ஐ.பி.சி (கொலை முயற்சி), 506(2) ஐ.பி.சி. (கொலை மிரட்டல்) உள்ளிட்ட 4 பிரிவுகளின் கீழ் வழக்குபதிவு செய்யப்பட்டுள்ளது.

ஆனாலும் அவர்களை சிறையில் அடைக்காமல், போலீஸ் காவலில் தொடர்ந்து மருத்துவமனையிலேயே சிகிச்சை அளிக்க அனுமதித்தனர். இதனால் அவர்களை கைதான நிலையிலும் மருத்துவமனையிலேயே சிகிச்சை பெற்று வருகின்றனர்.

இருவரிடமும் இன்று ஜார்ஜ்டவுன் 7வது கோர்ட்டு மாஜிஸ்திரேட் ரவி மருத்துவமனைக்குச் சென்று விசாரணை நடத்துகிறார். அப்போது சைதாப்பேட்டை நீதித்துறை அதிகாரிகளும் உடன் இருப்பார்கள். இதன்பிறகு பாரதிகண்ணன், ஆறுமுகம் இருவரும் சிறையில் அடைக்கப்படுவார்கள் எனத் தெரிகிறது.

இந்த மோதலில் காயமடைந்த மாணவர் சித்திரைச்செல்வன் கைது செய்யப்பட்டு ராயப்பேட்டை அரசு ஆஸ்பத்திரியில் சிகிச்சை பெற்று வந்தார். கைதிகள் வார்டில் பலத்த போலீஸ் பாதுகாப்புடன் கடந்த 25 நாட்களுக்கும் மேலாக சிகிச்சை பெற்றுவந்த சித்திரைச்செல்வன் நேற்று சைதாப்பேட்டை சப்- ஜெயிலில் அடைக்கப்பட்டது குறிப்பிடத்தக்கது.

சட்டக்கல்லூரி மோதல் மற்றும் கல்லூரி முதல்வர் அறையை சூறையாடியது என எஸ்பிளனேடு போலீஸ் நிலையத்தில் 2 வழக்குகள் தனித்தனியாக பதிவு செய்யப்பட்டுள்ளன.

இதில் சட்டக்கல்லூரி வளாகத்தில் நடந்த மோதல் வழக்கில் தற்போது கைதாகியுள்ள பாரதி கண்ணன், ஆறுமுகம் ஆகியோருடன் சேர்த்து இதுவரை 23 பேர் கைதாகியுள்ளனர். 9 பேர் கோர்ட்டில் சரண் அடைந்துள்ளனர்.

கல்லூரி முதல்வர் அறையை சூறையாடிய வழக்கில் 14 பேர் கைதாகியுள்ளனர்.

இதற்கிடையே நீதிமன்பற உத்தரவுபடி நேற்று சட்டக் கல்லூரி தேர்வுகள் தொடங்கின. இதனால் அங்கு பலத்த போலீஸ் பாதுகாப்பு போடப்பட்டுள்ளது.