திருமங்கலம்-தேமுதிக வேட்பாளர் தனபாண்டியன்

மதுரை: திருமங்கலம் தொகுதி இடைத் தேர்தலில் தேமுதிக சார்பில் தனபாண்டியன் போட்டியிடுகிறார். இவர் கடந்த தேர்தலில் இதே தொகுதியில் போட்டியிட்டு தோற்றவர் ஆவார்.

மதுரை திருமங்கலம் சட்டமன்றத் தொகுதி இடைத்தேர்தல் வரும் 9ம் தேதி நடக்கிறது.

வேட்பு மனு தாக்கல் 15ம் தேதி தொடங்கியது. 22ம் தேதி வேட்பு மனு தாக்கல் செய்ய கடைசி நாள். இங்கு இதுவரை 3 சுயேச்சைகள் வேட்பு மனு தாக்கல் செய்துள்ளனர்.

திமுக சார்பில் லதா அதியமான் வேட்பாளராக அறிவிக்கப்பட்டுள்ளார்.

இந் நிலையில் தேமுதிக வேட்பாளரை தேர்வு செய்ய விஜய்காந்த் இரு நாட்களுக்கு முன் மதுரை வந்தார். அவரிடம் 40 பேர் போட்டியிட வாய்ப்பு கோரி மனு தந்தனர். இவர்களில் தனபாண்டியனை விஜய்காந்த் தேர்வு செய்துள்ளார்.

தேமுதிகவின் மதுரை மாவட்ட கட்சி அலுவலகத்தில் தனபாண்டியனை மாநிலப் பொருளாளர் சுந்தரராஜன் இன்று அறிமுகம் செய்து வைத்தார்.

தனபாண்டியன் கடந்த சட்டமன்ற தேர்தலில் இதே தொகுதியில் போட்டியிட்டு 19,970 வாக்குகள் பெற்றவர் என்பது குறிப்பிடத்தக்கது.

இவரது சொந்த ஊர் திருமங்கலம் அருகே உள்ள வாகைக்குளம் ஆகும். இவர் தேமுதிக மதுரை தெற்கு மாவட்ட துணைச் செயலாளராகவும் உள்ளார்.

இன்னும் அதிமுக தனது வேட்பாளரை அறிவிக்கவில்லை.