குடியரசு தின பாதுகாப்பு: டெல்லி ராஜ்பாத்தில் 22 கண்காணிப்பு டிவி கேமராக்கள் பொருத்தம்

டெல்லி: குடியரசு தின பாதுகாப்பை முன்னிட்டு, டெல்லி ராஜ்பாத்தில், 22 கண்காணிப்பு கேமராக்கள் பொருத்தப்பட்டு கண்காணிக்க ஏற்பாடு செய்யப்பட்டுள்ளது.

ராஜ்பாத் ஒன்றரை கிலோ தூரம் கொண்டது. இங்குதான் குடியரசு தின விழா அணிவகுப்பு நடைபெறும். அப்போது தீவிரவாத தாக்குதல் நடந்து விடாமல் தடுக்கும் பொருட்டு பலத்த பாதுகாப்புக்கு ஏற்பாடு செய்யப்பட்டு வருகிறது.

குடியரசுத் தலைவர் மாளிகை நோக்கி செல்லும் சாலை, இந்தியா கேட் உள்ளிட்ட ராஜ்பாத்தின் பல்வேறு முக்கிய இடங்களில் இந்த கண்காணிப்பு டிவி கேமராக்கள் பொருத்தப்படவுள்ளன.

இந்த சாலை முழுவதையும் துல்லியமாக கண்காணிக்கக் கூடிய வகையில் இவை பொருத்தப்படுகிறது. இந்த கேமராக்களின் கண்களிலிருந்து ஒரு ஈ, காக்கை கூட தப்பாது என்று பாதுகாப்புத்துறையினர் தெரிவித்துள்ளனர்.

ஜனவரி 19ம் தேதி முதல் 26ம் தேதி வரை இந்த கண்காணிப்பு டிவி கேமராக்கள் செயல்பாட்டில் இருக்கும்.

நாலாபக்கமும் சுழலக் கூடிய பான் டில்ட் ஜூம் கேமராக்கள் இதில் இடம் பெறும். ராஜ்பாத் பகுதியில் இந்த 22 கேமராக்களையும் கண்காணிக்க பிரமாண்டமான கட்டுப்பாட்டு அறையும் அமைக்கப்படுகிறது.

மும்பைத் தாக்குதலின் எதிரொலியாக எந்தவித தாக்குதலும் நடந்து விடக் கூடாது என்ற முன்னெச்சரிக்கையில் இந்த கேமராக்கள் பொருத்தப்படுவதாக அதிகாரிகள் தெரிவித்துள்ளனர்.