வீட்டுக் கடனுக்கான வட்டியைக் குறைத்தது எல்.ஐ.ஜி. ஹவுசிங் பைனான்ஸ்

மும்பை: எல்.ஐ.சி ஹவுசிங் பைனான்ஸ் கார்ப்பரேஷன் நிறுவனம், புதிய வாங்கும் வீட்டுக் கடன்களுக்கான வட்டி விகிதத்தைக் குறைத்துள்ளது.

வீட்டுக் கடன்களுக்கான வட்டி விகிதங்களைக் குறைக்க வேண்டும் என மத்திய அரசு வங்கிகளுக்கு நிர்ப்பந்தம் கொடுத்தது. இதன் விளைவாக வங்கிகள் வீட்டுக் கடன்களுக்கான வட்டி விகிதங்களைக் குறைத்து வருகின்றன.

இந்த நிலையில் எல்.ஐ.ஜி. ஹவுசிங் பைனான்ஸ் நிறுவனமும் தனது வட்டி விகிதத்தைக் குறைத்துள்ளது.

அதன்படி ரூ. 20 லட்சம் வரை கடன் வாங்குவோருக்கு, முதல் ஐந்து ஆண்டுகளுக்கு 9.25 சதவீத வட்டியும், அதற்கு மேல் வரும் ஆண்டுகளுக்கு 9.75 வட்டியும் வசூலிக்கப்படும்.

20 லட்சத்திற்கு மேலான கடன் தொகைக்கு தற்போது உள்ள 11.50 சதவீதத்திலிருந்து 11.25 சதவீதமாக வட்டி குறைக்கப்பட்டுள்ளது.

2009ம் ஆண்டு ஜூன் மாதம் வரை இந்த வட்டிக் குறைப்பு விகிதம் அமலில் இருக்கும்.

இதுதவிர இலவச காப்பீடு, கடனை முன் கூட்டியே திருப்பிச் செலுத்தும்போது போடப்படும் அபராதத் தொகை ரத்து உள்ளிட்ட சலுகைகளும் அறிவிக்கப்பட்டுள்ளது.