சத்யம் புரமோட்டருக்கு ரூ. 2372 கோடி இழப்பு

ஹைதராபாத்: கடந்த 8 மாதங்களில் சத்யம் கம்ப்யூட்டர் நிறுவன பங்குகளின் புரமோட்டருக்கு ரூ.2372 கோடி இழப்பு ஏற்பட்டுள்ளது.

மேடாஸ் இணைப்பு முயற்சி தோல்வி, உலக வங்கி தடை என அடுத்தடுத்த சிக்கலில் மாட்டிக் கொண்ட சத்யம் நிறுவனத்தின் பங்குகள் இதுவரை இல்லாத அளவு ரூ.114.65 க்கு வந்துவிட்டது.

கடந்த மே மாதம் இதே பங்குகள் 544 ரூபாய்க்கு விற்கப்பட்டது நினைவிருக்கலாம். மே மாதம் இந்த நிறுவன தலைவர் ராமலிங்க ராஜூ மற்றும் அவரது குடும்பத்துக்கு சொந்தமான சத்யம் பங்குகளின் மதிப்பு ரூ.3155.52 கோடியாக இருந்தது. இப்போது ரூ. 783 கோடிக்கு வந்துவிட்டது.

மேடாஸை வாங்க முயற்சித்த டிசம்பர் 16ம் தேதி கூட சத்யம் பங்கு விலை ரூ.236 ஆக இருந்தது. அடுத்த பத்தே நாளில் சத்யம் பங்குகள் விலை பாதியாகக் குறைந்துள்ளது.

இனியும் சத்யம் தலைவராக ராஜூ நீடிப்பது நிறுவனத்துக்கு எதிராகவே அமையும் என்றே முதலீட்டாளர்களும், பங்குச் சந்தை நிபுணர்களும் கருதுகின்றனர்.