வாஜ்பாய் பிறந்தநாள்-பிரதீபா பாட்டீல் வாழ்த்து

டெல்லி: முன்னாள் பிரதமர் வாஜ்பாயின் 85வது பிறந்த நாளையொட்டி அவருக்கு குடியரசுத் தலைவர் பிரதீபா பாட்டீல் வாழ்த்து தெரிவித்தார்.

முன்னாள் பிரதமரும், பாஜக பிதாமகர்களில் ஒருவருமான வாஜ்பாய்க்கு இன்று 85வது பிறந்த நாளாகும். மும்பை தீவிரவாதத் தாக்குதலில் இறந்தோருக்கு அஞ்சலி செலுத்தும் வகையில் தனது பிறந்த நாளை கொண்டாடுவதில்லை என்று வாஜ்பாய் முடிவெடுத்திருந்தார்.

அதன்படி வாஜ்பாய் தனது பிறந்த நாளை இன்று கொண்டாடவில்லை. அதேபோல பாஜக சார்பிலும் பிறந்த நாள் நிகழ்ச்சி எதுவும் ஏற்பாடு செய்யப்படவில்லை.

இருப்பினும் பல்வேறு தலைவர்கள் வாஜ்பாயை நேரில் சந்தித்து வாழ்த்தினர்.

குடியரசுத் தலைவர் பிரதீபா பாட்டீல் சார்பில் பூங்கொத்தும், வாழ்த்துச் செய்தியும், வாஜ்பாய்க்கு அனுப்பி வைக்கப்பட்டது. பிரதமர் மன்மோகன் சிங் நேரில் சென்று வாழ்த்து தெரிவிக்கவுள்ளார்.