ராஜுவுக்கு ஆதரவாக இணையதளம் தொடக்கம்-உடனடியாக மூடல்
ஹைதராபாத்: மெகா மோசடியில் ஈடுபட்டு இந்தியாவின் பெயரை உலக அரங்கில் களங்கப்படுத்தி விட்ட சத்யம் கம்ப்யூட்டர்ஸ் நிறுவன தலைவர் ராமலிங்க ராஜுவுக்கு ஆதரவாக அவரது ஆதரவாளர்கள் இணையதளம் ஒன்றைத் தொடங்கினர். ஆனால் தற்போது அந்த இணையதளம் செயல்படவில்லை.
ராஜுவின் நல்ல விஷயங்களை விளக்கும் வகையில் இந்த இணையதளம் ஆரம்பிக்கப்பட்டது.
அதில், மைடாஸ் தவறான ஒரு ஒப்பந்தம். இருப்பினும் ராஜு, உங்களை நாங்கள் இன்னும் நம்புகிறோம், ஆதரவு தெரிவிக்கிறோம். சத்யம் கம்ப்யூட்டர்ஸ் உயிர்ப்புடன் இருக்க தேவையான நடவடிக்கைகளை நீங்கள் எடுங்கள்.
நாங்கள் உங்கள் மீது அன்பு செலுத்துகிறோம் ராஜு. உங்களிடம் நல்ல பார்வை, லட்சியம் குறிக்கோள் உள்ளது. அதேசமயம், நீங்கள் ரியல் எஸ்டேட் உள்ளிட்ட தொழிலில் இறங்கியது சரியான நடவடிக்கையல்ல.
ஒரு சாப்ட்வேர் நிறுவன அதிபராக இருந்து கொண்டு, ரியல் எஸ்டேட் தொழிலில் ஈடுபட்டதால், நீங்கள் முற்றிலும் அரசியல்வாதிகளை சார்ந்து இருக்க வேண்டிய நிலை ஏற்பட்டு விட்டது.
நீங்கள் அரசியல்வாதிகளிடமிருந்து விலகி வாருங்கள். அப்படி வெளி வந்து சத்யம் கம்ப்யூட்டர்ஸ் மீது முழுக் கவனத்தையும் செலுத்தினால் நிச்சயம் பல புதிய தொழில் உத்திகளை அறிமுகம் செய்வீர்கள். சத்யத்தை தலை நிமிர வைப்பீர்கள் என்று கூறப்பட்டிருந்தது.
சத்யம் நிறுவனத்தின் முன்னாள் ஊழியர் ஒருவர் இந்த இணையதளத்தை ஆரம்பித்தார். ஆனால் தற்போது இந்த இணையதளம் செயல்படவில்லை.