இன்டர்நெட்டில் ராஜு மீது முட்டை வீச்சு!

பெங்களூர்: சத்யம் நிறுவன முன்னாள் தலைவர் ராமலிங்க ராஜுவின் முகத்தின் மீது அழுகிய முட்டைகளை வீசும் விளையாட்டை இன்டர்நெட்டில் புகுத்தியுள்ளனர்.

புஷ் மீது முன்பு ஷூ வீசப்பட்டபோது, இன்டர்நெட்டில் அதை அடிப்படையாக வைத்து விளையாட ஆரம்பித்தனர். வித விதமான ஷூக்களை வீசி எறிவது, சரியாக குறி பார்த்து அடிப்பவருக்குப் பாயிண்ட்ஸ் என கலக்கினர்.

இப்போது இன்டர்நெட் குசும்பர்கள் கையில் சத்யம் ராமலிங்க ராஜூ சிக்கியுள்ளார். அவரது முகத்தின் மீது அழுகிய முட்டைகளை வீசி பாயின்ட் எடுக்கும் விளையாட்டை அறிமுகப்படுத்தியுள்ளனர்.

அந்த இணையதளத்தில் ராமலிங்க ராஜுவின் முகம் மாறி மாறி வருகிறது. அந்த முகத்தின் மீது குறி தப்பாமல் அழுகிய முட்டையை வீசி அடித்தால் ஒரு பாயின்ட்டாம். குறிப்பிட்ட நேரத்திற்குள் முட்டையை அடித்தால் கூடுதல் பாயின்ட் கிடைக்கும்.

இதுவரை அதிக பாயின்ட்டுகளைப் பெற்று முன்னணியில் இருப்பவர் ஆசிஷ் கன்சால் என்பவர். அவர் 8,323 புள்ளிகளைப் பெற்று முட்டையடிப்பதில் முன்னணி வகிக்கிறார்.

இந்த இணையதளத்திற்கு நெய்ல் தி தீஃப் என பெயரும் வைத்துள்ளனர். இந்த இணையதளத்திற்கு இதுவரை ஒரு லட்சத்து 17 ஆயிரத்து 772 ஹிட்ஸ்கள் கிடைத்துள்ளன என்பது குறிப்பிடத்தக்கது.

இந்த குசும்பு விளையாட்டை தொடங்கியது யார் என்ன என்ற விவரம் அந்த தளத்தில் இல்லை.