இந்தியாவில் பொருளாதாரம் மந்தமில்லை - ப.சிதம்பரம்

சென்னை: இந்தியாவில் பொருளாதார மந்தம் என்ற அபாயம் இன்னும் வரவில்லை என்று மத்திய உள்துறை அமைச்சர் ப.சிதம்பரம் கூறியுள்ளார்.

பாரதிய யுவ சக்தி என்ற அமைப்பை இன்று சென்னையில் துவங்கி வைத்த அவர் கூறியதாவது:

இந்தியாவின் உற்பத்தித் துறை கடுமையான பாதிப்பை சந்தித்து வருகிறது. இது விரைவில் சரியாகும். அதற்கான நடவடிக்கைகளில் அரசு முனைப்பு காட்டி வருகிறது.

நிதித்துறை நடவடிக்கைகளை மத்திய அரசும், பணவியல் நடவடிக்கைகளை மத்திய ரிசர்வ் வங்கியும் எடுத்து வருகின்றன. நிச்சயம் இந்தியப் பொருளாதாரம் மந்த நிலைக்குப் போகாது என்பதற்கான அறிகுறிகள் வலுவாக உள்ளன.

உலக நாடுகளில் நிலவும் மோசமான பொருளாதாரம் காரணமாக சற்று பணத் தட்டுப்பாடு நிலவும் சூழ்நிலை வரும். ஆனால் அதை இந்தியாவின் அரசுத் துறை வங்கிகள் சமாளித்துக் கொள்ளும்.

மக்களின் வாங்கும் சக்தியை அதிகரிக்க அரசு வங்கிகள் அதிக கடன்களை வழங்க உள்ளன, என்றார் சிதம்பரம்.