பிரதமர் பதவிக்கு புதியவர் - காங்கிரஸ் நிராகரிப்பு

டெல்லி: மன்மோகன் சிங் உடல் நலனைக் கருத்தில் கொண்டு புதிய பிரதமரை நியமிக்கும் பேச்சுக்கே இடமில்லை என்று காங்கிரஸ் தெளிவுபடுத்தியுள்ளது.

இதுகுறித்து காங்கிரஸ் மூத்த தலைவர் வீரப்ப மொய்லி கூறுகையில், இது பொருத்தமே இல்லாத கேள்வி. ஒரு நேரத்தில் ஒரு பிரதமர்தான் இருக்க முடியும். இப்போதைய பிரதமர் மன்மோகன் சிங்தான். அதில் எந்த மாற்றமும் இல்லை.

பிரதமரின் உடல் நலனையடுத்து புதிய ஒருவரை பிரதமராக நியமிக்கும் கேள்விக்கே இடமில்லை. இது பொருத்தமே இல்லாத கேள்வியும் கூட.

இந்திய அரசியல் சட்டப்படி ஒரு நேரத்தில் ஒரு பிரதமர்தான் இருக்க முடியும். எனவேதான் வெளியுறவுத்துறை அமைச்சர் பிரணாப் முகர்ஜியை, இடைக்கால பிரதமராக நியமிக்கவில்லை.

பிரதமர் வெளிநாடு செல்லும்போது அவருக்கு அடுத்த நிலையில் உள்ள மூத்த அமைச்சரிடம் பொறுப்புகள் வழங்கப்படுவது வழக்கமானது. அந்த அடிப்படையில்தான் பிரணாப் முகர்ஜியிடம், பிரதமரின் பொறுப்புகள் தற்போது வழங்கப்பட்டுள்ளன.

இன்னும் 2 வாரங்களில் பிரதமர் குணமடைந்து மீண்டும் பணிக்குத் திரும்பி விடுவார். எனவே புதிய தலைவரை நியமிப்பது என்ற பேச்சுக்கே இடமில்லை என்றார் அவர்.