சத்யம் நிறுவனத்தை வாங்கும் போட்டியில் இந்துஜா சகோதரர்கள்

டெல்லி: சத்யம் நிறுவனத்தை வாங்க கடும் போட்டி கிளம்பியுள்ளது. இதற்காக விருப்பம் தெரிவித்துள்ளோர் பட்டியலில் புதிதாக இந்துஜா சகோதரர்கள் இணைந்துள்ளனர்.

இந்துஜா குழுமத்தின் இந்துஜா குளோபல் சொலூஷன்ஸ் நிறுவனம், சத்யம் நிறுவனத்தை வாங்க விருப்பம் தெரிவித்துள்ளது.

இதுகுறித்து இந்துஜா சொலூஷன்ஸ் நிறுவன அதிகாரிகள் கூறுகையில், இதுதொடர்பாக சத்யத்திற்கான புதிய முதலீட்டு வங்கியான கோல்ட்மேன் சாக்ஸ் நிறுவனத்திற்கு இந்துஜா குளோபல் சொலூஷன்ஸ் விருப்பத்தைத் தெரிவித்துள்ளது.

எப்போது சத்யம் ஏலத்திற்கு வருகிறதோ, அப்போது அதில் கலந்து கொள்ள எங்களது நிறுவனம் விருப்பம் தெரிவித்துள்ளது.

தற்போது இந்துஜா குளோபல் சொலூஷன்ஸ் நிறுவனத்திடம் 100 மில்லியன் டாலருக்கும் மேலான நிதி உள்ளது. தேவைப்பட்டால் புரமோட்டர்களான இந்துஜா சகோதரர்கள் உதவிக் கரம் நீட்டுவார்கள் என்று தெரிவித்தனர்.

ஏற்கனவே எல் அன்ட் டி, ஸ்பைஸ் குழுமம் ஆகியவை சத்யத்தை வாங்க விண்ணப்பம் தெரிவித்துள்ளன. தற்போது மூன்றாவதாக இந்துஜாவும் இணைந்துள்ளது.

பிப்ரவரி 5ம் தேதி சத்யம் நிறுவனத்தின் இயக்குநர் குழுக் கூட்டம் நடைபெறுகிறது. அப்போது இந்த நிறுவனங்களின் விருப்பம் குறித்து பரிசீலிக்கப்படும் எனத் தெரிகிறது.