தங்கம்: பவுனுக்கு ரூ.48 குறைந்தது!

சென்னை: கிடுகிடுவென உயர்ந்து வந்த தங்கத்தின் விலையில் நேற்று ஒரு சின்ன வீழ்ச்சி. நேற்று திங்கள்கிழமை பவுனுக்கு ரூ.48 குறைந்து விற்பனையானது.

பங்குச் சந்தை வீழ்ச்சி பெரிய அளவில் நிகழந்து வருவதால், பெரும்பாலும் தங்கமே பாதுகாப்பான முதலீடு என பலரும் தங்கம் வாங்கத் துவங்கிவிட்டனர்.

மேலும் இப்போது திருமண சீசன் என்பதாலும் தங்கத்தின் விலை கடந்த மாதம் இறுதியில் இருந்து உயர்ந்து கொண்டே வந்தது. கடந்த மாதம் 25-ந் தேதி அதிகபட்சமாக ஒரு பவுன் தங்கம் ரூ.10,408-க்கு விற்பனை ஆனது. அன்றிலிருந்து தொடர்ந்து தங்கத்தின் விலை ஏறுமுகமாகவே இருந்து வந்தது.

கடந்த 30-ந் தேதி வரலாறு காணாத வகையில் ஒரு பவுன் தங்கம் ரூ.10,472 ஆக உயர்ந்தது. இந்த நிலையில் நேற்று முன் தினம் ஒரு பவுன் ரூ.10,424-க்கு விற்பனை ஆனது. நேற்று ஒரு பவுன் ரூ.10,376 ஆக குறைந்தது. அதாவது ஒரே நாளில் பவுனுக்கு ரூ.48 குறைந்துள்ளது குறிப்பிடத்தக்கதாகும். உலக பொருளாதாரத்தில் நிலவும் வலுவற்ற சூழ்நிலை காரணமாக தங்கத்தின் விலை சற்று குறைந்துள்ளதாக நகைக்கடைக்காரர்கள் தெரிவித்தனர்.