வீழ்ச்சியை நோக்கி இந்திய பொருளாதாரம்!

டெல்லி: கடந்த 6 ஆண்டுகளில் இல்லாத அளவு வீழ்ச்சியை இந்த நிதி ஆண்டில் சந்தித்துள்ளது இந்தியப் பொருளாதாரம். கடந்த ஆண்டு 9 சதவீதமாக இருந்த பொருளாதார வளர்ச்சி, இந்த ஆண்டு 2 சதவீதம் வரை குறைந்து 7.1 சதவீகிதமாக மாறியுள்ளது. இந்த வளர்ச்சி அளவும் கூட இன்னும் குறையக்கூடும் என எதிர்பார்க்கப்படுகிறது.

நாட்டின் மூலதனப் பொருள் உற்பத்தித் துறையில் 5 சதவீதம் அல்லது அதற்கும் குறைவாகவே கடந்த ஆண்டு வளர்ச்சி இருந்ததாகவும், அதன் விளைவுதான் இந்த அளவு பொருளாதாரம் வீழ்ச்சியடைந்துள்ளதாகவும் நிபுணர்கள் தெரிவித்துள்ளனர்.

அரசு அளிக்கும் நிதிச் சலுகைகள் மட்டுமே இந்த வீழ்ச்சியைத் தடுத்து நிறுத்தும் என எதிர்பார்க்க முடியாது. இப்போதுள்ள நிலையை காப்பாற்றிக் கொள்ள வேண்டுமானால் இந்த சலுகைகள் உதவக் கூடும். ஆனால் தொடர்ந்து வளர்ச்சியைத் துரிதப்படுத்த, இன்னும் சில நடவடிக்கைகள் தேவை.

குறிப்பாக நடைமுறை விலைகளை அரசு கட்டுப்படுத்தத் தவறி வருகிறது. இதன் பாதிப்பு பெருமளவு இருக்கும். பணவீக்கம் பெயரளவுக்குக் குறைந்திருந்தாலும், நடைமுறையில் இன்னும் விலைகள் உச்சத்திலேயே உள்ளன.

வருகிற அக்டோபர் வரை கடுமையான சூழலில் இந்தியப் பொருளாதாரம் பயணம் செய்ய வேண்டிவரும், என்கிறார்கள் நிபுணர்கள்.