கச்சா எண்ணெய் விலை 36 டாலராக சரிவு!

சிங்கப்பூர்: கச்சா எண்ணெய் விலை மேலும் சரிந்து பீப்பாய் ஒன்றுக்கு 35.94 டாலராகிவிட்டது.

அமெரிக்காவில் பெட்ரோலியப் பொருள்களுக்கான நுகர்வோர் தேவை மேலும் மேலும் குறைந்து போய்விட்டதால், இதற்குமேல் இருப்பு வைப்பதில் பயனில்லை என்னும் சூழ்நிலை காரணமாக இந்த விலைக் குறைப்பு ஏற்பட்டுள்ளது.

அமெரிக்காவில் பெருகிவரும் வேலையின்மை காரணமாக கேஸோலின் நுகர்வில் பெரும் வீழ்ச்சி ஏற்பட்டுள்ளது. இதனால் எதிர்பார்த்ததை விட நாளொன்றுக்கு 6 மில்லியன் பேரல் கச்சா எண்ணெய் தேக்கமடைகிறதாம். கடந்த 6 வாரங்களில் மட்டும் 30 மில்லியன் பேரல்கள் கச்சா எண்ணெய் இருப்பில் சேர்ந்துள்ளது.

சர்வதேச அளவிலும் நாளொன்றுக்கு பயன்படுத்தப்படும் பெட்ரோலியப் பொருள்களின் அளவு வெகுவாகக் குறைந்துவிட்டதால், விலை தானாகவே இறங்கத் தொடங்கிவிட்டதாகத் தெரிவித்துள்ளனர் எண்ணெய் சந்தை நிபுணர்கள்.

இப்படி விலை குறைவது கூட நல்லதுதான். அதிக விலை குறைப்பு காரணமாக, மீண்டும் தேவை அதிகரித்து நிலைமை சரியாகும் வாய்ப்பு உள்ளதாகவும் நிபுணர்கள் நம்பிக்கை தெரிவித்துள்ளனர்.