ஒபாவை சந்திக்கும் முகேஷ்-பிரேம்ஜி!

மும்பை: உலகம் பெரும் பொருளாதார நெருக்கடியில் சிக்கித் தவிக்கும் இந்தச் சூழலில் அமெரிக்க அதிபர் பாரக் ஒபாமாவைச் சந்தித்துப் பேசுகின்றனர் இந்தியத் தொழிலதிபர்கள் முகேஷ் அம்பானியும் அஜிம் பிரேம்ஜியும்.

இந்திய அமெரிக்க வர்த்தக உறவுகள் குறித்தும், வருங்காலத்தில் தொழில் அபிவிருத்திக்காக மேற்கொள்ளப்பட வேண்டிய நடவடிக்கைகள் குறித்தும் ஒபாமாவுடன் அவர்கள் கலந்துரையாடுகின்றனர்.

இந்தியாவின் முதல்நிலை தொழிலதிபர் முகேஷ் அம்பானி. ஐடி துறையில் இன்று முன்னணியில் உள்ள விப்ரோவின் தலைவர் பிரேம்ஜி. இந்த இருவருடன் உலக அளவில் பிரபலமாக உள்ள மேலும் சில நிறுவனங்களின் சிஇஓக்கள் இணைந்து 'பிஸினஸ் கவுன்சில்' எனும் ஒரு குழுவாக ஒபாமைச் சந்தித்துப் பேசுகிறார்கள். வெள்ளை மாளிகையில் நாளை வெள்ளிக்கிழமை காலை இந்த சந்திப்புக்காக 2 மணிநேரம் ஒதுக்கியுள்ளார் ஒபாமா.

அமெரிக்க அதிபரான பிறகு ஒபாமைச் சந்திக்கும் முதல் இந்திய வர்த்தகப் பிரதிநிதிகள் இந்த இருவரும்தான் என்பது குறிப்பிடத்தக்கது.