தீவிரவாதி கஸாப் வேடத்தில் நடிப்பவருக்கு அடி
மும்பை: இந்தியில் உருவாகும் டோட்டல் டென் என்ற படத்தில் தீவிரவாதி கஸாப் வேடத்தில் நடித்து வரும் நடிகர் ராஜன் வர்மாவை சில அடையாளம் தெரியாத நபர்கள் தாக்கினர்.
ராம் கோபால் புரடக்ஷன்ஸ் என்ற நிறுவனம் டோட்டல் டென் என்ற படத்தை தயாரித்து வருகிறது. இப்படத்தை சுரேந்தர் சூரி என்பவர் எழுதி, இயக்குகிறார். இப்படத்தில் கஸாப் வேடத்தில் ராஜன் வர்மா நடிக்கிறார். இவரை நேற்று காலை அடையாளம் தெரியாத சிலர் தாக்கியுள்ளனர்.
இதுகுறித்து வர்மா கூறுகையில், நான் படப்பிடிப்புக்காக மலட்டிலிருந்து காரேகானுக்குப் ஹோன்டா சிட்டி காரில் போய்க் கொண்டிருந்தேன். அப்போது ஒருவர் எனது காரை தடுத்து நிறுத்தினார். அப்போது மேலும் சிலரும் அங்கு வந்தனர். டோட்டல் டென் படத்தில் கஸாப் வேடத்தில் நடிக்கக் கூடாது என்று அவர்கள் என்னை வற்புறுத்தினர்.
இந்த நிலையில் திடீரென அவர்கள் எனது கார் மீது தாக்குதல் நடத்தினர். கார் கண்ணாடியை அடித்து உடைத்தனர். பிறகு என்னையும் அவர்கள் தாக்கினர்.
அவர்கள் யார் என்று தெரியவில்லை. அப்போதுதான் முதல் முறையாக அவர்களை பார்த்தேன் என்றார் வர்மா.
இந்த சம்பவம் குறித்து போலீஸார் விசாரணை நடத்தி வருகின்றனர்.