அத்வானியை சந்தித்தார் அமெரிக்க தூதர் முல்போர்டு

டெல்லி: நாடாளுமன்ற எதிர்கட்சி தலைவர் அத்வானியை அமெரிக்க தூதர் டேவிட் முல்போர்டு சந்தித்தார்.

அமெரிக்காவில் ஒபாமா அரசு பதவியேற்றதை அடுத்து நிர்வாக மாற்றங்கள் நடந்து வருகின்றன. இந்தியாவுக்கான அமெரிக்க தூதர் டேவிட் முல்போர்டின் பதவி காலம் கடந்த மாதம் முடிந்த நிலையில் அவரது பதவி மேலும் சில நாட்களுக்கு நீட்டிக்கப்பட்டது.

இந்நிலையில் இன்னும் ஓரிரு நாட்களில் அவர் அமெரிக்கா திரும்புகிறார். முன்னாள் அதிபர் ஜார்ஜ் புஷ்ஷின் நெருக்கமானவரான இவர் இந்திய- அமெரிக்க அணு சக்தி கூட்டு ஒப்பந்தம் ஏற்படுவதில் முக்கிய பங்காற்றினார்.

அவர் விடைபெறுவதற்கு முன் முக்கிய தலைவர்களை சந்தித்து வருகிறார். கடந்த வாரம் உள்துறை அமைச்சர் சிதம்பரத்தை சந்தித்தார்.

நேற்று முன்தினம் பாஜக பிரதம வேட்பாளரும், நாடாளுமன்ற எதிர்கட்சி தலைவருமான அத்வானியை நேரில் சென்று சந்தித்தார்.

இது குறித்து பாஜக செய்திகுறிப்பு ஒன்று கூறுகையில், இது மரியாதை நிமித்தமான சந்திப்பு. சந்திப்பின் போது தெற்கு ஆசிய சூழ்நிலை, பாகிஸ்தானில் ஸ்வாட் பகுதியில் ஏற்பட்டுள்ள நிலையற்ற தன்மை, அங்கு தாலிபான் தீவிரவாதிகளின் நடமாட்டம் ஆகியவை குறித்து ஆலோசிக்கப்பட்டது என்றார்.