காங்கிரஸ் தேர்தல் கோஷம்..'ஜெய் ஹோ'!

டெல்லி: எதைத் தின்றால் பித்தம் தெளியும் என்ற நிலைக்குப் போய்விட்டன அரசியல் கட்சிகள். எங்கும் எதிலும் அரசியல் வியாபாரமே கொடிகட்டிப் பறக்கிறது.

சமீபத்தில் ஆஸ்கர் வென்று வந்த ரஹ்மானின் சாதனையை அப்படியே முழுசாக அரசியலுக்குப் பயன்படுத்திக் கொள்ளத் துடிக்கிறது காங்கிரஸ் கட்சி.

ஆஸ்கர் விருது பெற்ற ஸ்லம்டாக் மில்லினர் படப் பாடலான ஜெய் ஹோ...வை அப்படியே தங்கள் பிரச்சாரத்துக்குப் பயன்படுத்திக் கொள்ள முடிவு செய்துள்ள காங்கிரஸ், இந்தப் பாடலை பெரும் தொகை கொடுத்து விலைக்கு வாங்கிவிட்டது.

இந்தப் பாடலின் உரிமை டி சீரிஸ் நிறுவனத்திடம் இருந்தது. இப்போது அதை பெரும் தொகை கொடுத்து விலைக்கு வாங்கியிருக்கிறது காங்கிரஸ் கட்சி.

ஜெய் ஹோ என்ற வார்த்தைக்கு வெற்றி உண்டாகட்டும் என்று அர்த்தம். இந்த வார்த்தையும் பாடலும் அதன் பின்னணியில் ஒளிவட்டமாய் தெரியும் ஆஸ்கர் விருதும் தங்கள் பிரச்சாரத்தை வெகுவாக மக்களிடம் கொண்டுபோய்ச் சேர்க்கும் என நம்புகிறது காங்கிரஸ் கட்சி.

இதற்கு முந்தைய தேர்தலில் ஆளும் கட்சியாக இருந்த பாஜக ' இந்தியா ஒளிர்கிறது' என்ற வாசகத்தை மையப்படுத்தி பிரச்சாரம் மேற்கொண்டது. ஆனால், அது பாஜகவையே கவிழ்த்துவிட்டது.

அந்தப் பாணியில் இப்போது 'ஜெய் ஹோ' என தனது பிரச்சாரத்தைத் தொடங்கியுள்ளது காங்கிரஸ் கட்சி. கோஷம் உதவுமா?.