கிரீன்வேஸ் சாலைக்கு தினகரன் பெயர்-இந்து முன்னணி போராட்டம்
சென்னை: சென்னை கிரீன்வேஸ் சாலைக்கு, மறைந்த கிறிஸ்தவ மத போதகர் டி.ஜி.எஸ். தினகரன் பெயர் சூட்டப்பட்டதற்கு எதிர்ப்பு தெரிவித்து இன்று மாலை இந்து முன்னணி போராட்டம் நடத்தவுள்ளது.
இதுகுறித்து இந்து முன்னணி அமைப்பாளர் ராம.கோபாலன் வெளியிட்டுள்ள அறிக்கை:
பழமையான கிரீன்வேஸ் ரோடு என்பதை மாற்றி, இந்துக்களை மத மாற்றம் செய்த டி.ஜி.எஸ்.தினகரன் பெயர் வைத்திருப்பது தமிழ் பண்பாட்டிற்கும், பெரும்பான்மை இந்து சமுதாயத்திற்கும் இழைக்கப்படுகிற மிகப் பெரிய அநீதி. இதை இந்து முன்னணி வன்மையாக கண்டிக்கிறது.
ஆழ்வார்பேட்டை கதீட்ரல் சாலைக்கு டி.டி.கிருஷ்ணமாச்சாரி சாலை (டி.டி.கே. ரோடு) என்று பெயர் சூட்டியபோது, கிறிஸ்தவர்கள் அதை எதிர்த்த காரணத்திற்காக எம்.ஜி.ஆர். அம்முயற்சியை கைவிட்டார்.
அதேபோல, திருவல்லிக்கேணி வாலாஜா சாலை என்ற பெயரை மாற்ற முயற்சித்தபோது முஸ்லிம்கள் எதிர்ப்பு தெரிவித்ததால் அந்த பெயர் மாற்றமும் கைவிடப்பட்டது.
ஆகவே, தமிழக அரசு இந்த பெயர் மாற்ற உத்தரவை திரும்ப பெற வலியுறுத்தி இந்து முன்னணி தமிழகம் முழுவதும் ஆர்ப்பாட்டம் நடத்துகிறது.
சென்னையில் 4-ம் தேதி மாலை 4.30 மணிக்கு கிரீன்வேஸ் சாலையில் உள்ள இயேசு அழைக்கிறார்' மையம் முன்பு ஆர்ப்பாட்டம் நடைபெறும் என்று அவர் தெரிவித்துள்ளார்.