அத்வானியின் வெப்சைட்டிலிருந்து தேசியக் கொடி நீக்கம்

கோட்டயம்: பாஜக பிரதமர் வேட்பாளர் எல்.கே.அத்வானியின் இணையதளத்தில் இடம் பெற்றிருந்த தேசியக் கொடி, கேரள மாநிலத்தைச் சேர்ந்த மகாத்மா காந்தி அறக்கட்டளையின் புகாரைத் தொடர்ந்து நீக்கப்பட்டு விட்டது.

அத்வானி உள்துறை அமைச்சராக இருந்தபோது அவரது இணையதளத்தில் தேசியக் கொடி இடம்பெற்றது. தற்போது அவர் எதிர்க்கட்சியாக இருந்தாலும், இணையதளம் வாயிலாக தேர்தல் பிரசாரம் மேற்கொள்ளப்பட்டு வருகிறது.

மற்ற அரசியல் கட்சிகளின் இணையதளங்களை விட அத்வானியின் இந்த இணையதளம் படு பிரபலமாகி விட்டது. இந்த இணையதளம் குறித்து அனைத்து இணையதளங்கள், பத்திரிக்கைகளில் பாஜக விளம்பரமும் செய்து வருகிறது.

இந்த நிலையில், தேர்தல் பிரசாரத்துக்காக தேசியக் கொடியை பயன்படுத்துவதற்கு கேரளாவைச் சேர்ந்த மகாத்மா காந்தி அறக்கட்டளை எதிர்ப்பு தெரிவித்திருந்தது.

மேலும் இணையதளம் மூலம் வெளியான விளம்பரத்திலும் தேசியக் கொடி இடம்பெற்றுள்ளதற்கு அறக்கட்டளை எதிர்ப்பு தெரிவித்திருந்தது.

இதையடுத்து இணையதளத்திலிருந்து தேசியக் கொடி உடனடியாக நீக்கப்பட்டு விட்டது