கோ ஏர் நிறுவனத்தை வாங்க முயலும் ஸ்பைஸ் ஜெட்
மும்பை: வாடியாவின் கோ ஏர் நிறுவனத்தை வாங்க அல்லது அதன் பெரும்பான்மைப் பங்குகளைக் கையகப்படுத்தும் முயற்சியில் தீவிரமாக இறங்கியுள்ளது மோடியின் ஸ்பைஸ்ஜெட் நிறுவனம்.
இது தொடர்பாக பேச்சு நடத்த கோ ஏரின் நிர்வாக இயக்குநர் ஜெய் வாடியாவைச் சந்தித்து பேச்சு நடத்தினார் ஸ்பைஸ்ஜெட் தலைமை நிர்வாகி சஞ்சய் அகர்வால்.
குறைந்த கட்டண விமான சேவையில் குறிப்பிடத்தக்க வளர்ச்சியைப் பெற்றுவருகிறது ஸ்பைஸ் குழுமம். அடுத்த இரு ஆண்டுகளில் இந்த விமான சேவையை பெருமளவு விரிவாக்கம் செய்யும் முயற்சியில் உள்ளது ஸ்பைஸ்.
அதன் முதல் கட்டமாகத்தான் கோ ஏர் விமான நிறுவனத்தை கையகப்படுத்தும் முயற்சியைத் தொடங்கியுள்ளதாம். கோ ஏர் நிறுவனம் ஆரம்பத்தில் இந்தியாவின் பெரும்பாலான நகரங்களுக்கு விரிவான விமான சேவைகளை வழங்கி வந்தது.
ஆனால் தொடர் நஷ்டம் காரணமாக பெருமளவு வழித் தடங்களில் சேவையை நிறுத்திவிட்டது. டெல்லி-சென்னை போன்ற முக்கிய தடங்களில் கூட கோ ஏர் சேவை நிறுத்தப்பட்டுவிட்டது.
இந்தச் சூழலில் கோ ஏரை வாங்கிப் போடுவது தமது சேவை விஸ்தரிப்புக்கு உதவும் என நம்புகிறது ஸ்பைஸ்.