மக்களவை தொகுதி அறிமுகம்-27: சிதம்பரம் (தனி)

சிதம்பரம் (தனி): சிதம்பரம் தொகுதியின் கீழ் இருந்து வந்த குறிஞ்சிப்பாடி, விருத்தாச்சலம் ஆகியவை கடலூர் தொகுதிக்குப் போய் விட்டன. மங்களூர் தொகுதியும் இப்போது இல்லை. குன்னம் என்ற புதிய சட்டசபைத் தொகுதி உருவாக்கப்பட்டு சேர்க்கப்பட்டுள்ளது.

சிதம்பரத்தில் இருந்த பழைய சட்டசபைத் தொகுதிகள் - குறிஞ்சிப்பாடி, புவனகிரி, காட்டுமன்னார்கோவில் (தனி), சிதம்பரம், விருத்தாச்சலம், மங்களூர் (தனி).

தற்போது உள்ள புதிய தொகுதிகள் - குன்னம், ஜெயங்கொண்டம், புவனகிரி, சிதம்பரம், காட்டுமன்னார்கோவில் (தனி).

ஒரு காலத்தில் காங்கிரஸ் கோட்டையாக திகழ்ந்த தொகுதி சிதம்பரம். தற்போது பாமக வசம் கடந்த 3 தேர்தல்களாக இருந்து வருகிறது. பாமக சார்பில் இரு முறை தேர்ந்தெடுக்கப்பட்ட பொன்னுச்சாமி ஒரு முறை மத்திய அமைச்சராகப் பதவி வகித்தார்.

அதேபோல தலித் எழுமலையும் இங்கு பாமக சார்பில் போட்டியிட்டு வென்று மத்திய அமைச்சராகப் பதவி வகித்துள்ளார்.

சட்டசபைத் தொகுதிகளைப் பொறுத்தமட்டில், புவனகிரியில் அதிமுகவின் செல்வி ராமஜெயமும், ஜெயங்கொண்டத்தில் அதிமுகவின் ராஜேந்திரனும், காட்டுமன்னார் கோவிலி்ல் விடுதலைச் சிறுத்தைகள் கட்சியின் ரவிக்குமாரும், மங்களூரில் விடுதலைச் சிறுத்தைகள் கட்சியின் செல்வமும், சிதம்பரத்தில் அதிமுகவின் அருண்மொழித் தேவனும் எம்.எல்.ஏக்களாக உள்ளனர்.

சிதம்பரம் தொகுதியில் அதிகபட்சம் காங்கிரஸ் 6 முறையும், திமுக 4 முறையும், பாமக 3 முறையும் வென்றுள்ளன. அதிமுக ஒரே ஒரு முறை வென்றுள்ளது.

கடந்த தேர்தல் நிலவரம்

இ.பொன்னுச்சாமி (பாமக) - 3,43,424
திருமாவளவன் (ஐக்கிய ஜனதாதளம்) 2,55,773
பெரியசாமி (பாஜக)-1,13,974
வெற்றி வித்தியாசம் - 87,651 வாக்குகள்.

இதுவரை எம்.பி. ஆக இருந்தவர்கள்

1957 - கனகசபை பிள்ளை - காங்கிரஸ்.
1957 - இளையபெருமாள் - காங்கிரஸ்.
1962 - கனகசபை பிள்ளை - காங்கிரஸ்.
1967 - மாயவன் - திமுக.
1971 - மாயவன் - திமுக
1977 - முருகேசன் - அதிமுக.
1980 - பி.குழந்தைவேலு - திமுக
1984 - வள்ளல்பெருமான் - காங்கிரஸ்
1989 - வள்ளல்பெருமான் - காங்கிரஸ்
1991 - வள்ளல்பெருமான் - காங்கிரஸ்
1996 - வி.கணேசன் - திமுக
1998 - ஆர். எழுமலை - பாமக
1999 - இ.பொன்னுச்சாமி - பாமக
2004 - இ.பொன்னுச்சாமி - பாமக

முதல் தேர்தல்

நடந்த ஆண்டு - 1957.
வென்றவர் - கனகசபை பிள்ளை (காங்கிரஸ்).