கார் விபத்தில் அமைச்சர் ஐ.பெரி‌யசாமி காயம்

வாடிப்பட்டி: வாடிப்பட்டி அருகே காரும், பஸ்சும் மோதிக் கொண்டதில் அமைச்சர் ஐ.பெரியசாமி காயமடைந்தார். அவருக்கு தலையில் காயம் ஏற்பட்டுள்ளது.

அமைச்சர் பெரியசாமி தனது திண்டுக்கல் அருகே உள்ள சொந்த கிராமமான ஆத்தூரில் இருந்து காரில் மதுரைக்கு கிளம்பினார்.

வாடிப்பட்டி அடுத்த வடுகப்பட்டி அருகே நான்குவழி சாலை அமைக்கும் பணிகள் நடந்து வருகின்றன. இதனால் இரு திசையில் செல்லும் வாகனங்களும் ஒரே ‌பாதையில் செல்கின்றன.

அமைச்சரின் கார் இந்த இடத்தில் வந்தபோது எதிரே நாகர்கோயிலில் இருந்து திருப்பூர் நோக்கி சென்ற அரசு பஸ் மோதியது.

இதில் அமைச்சர் பெரியசாமிக்கு தலையில் பலத்த காயம் ஏற்பட்டது. இதையடுத்து அவர் இன்னொரு காரில் மதுரை மருத்துவமனைக்கு அனுப்பப்பட்டார்.

சம்பவம் குறித்து போலீசார் விசாரணை நடத்தி வருகிறார்கள்.