தேமுதிக விண்ணப்பத்தில் ஜாதி பெயருக்கு தடை!!

சென்னை: தேமுதிகவின் நாடாளுமன்ற தேர்தல் விண்ணப்பத்தில் ஜாதி பெயர், சொத்து மதிப்பு போன்றவைகள் இடம்பெறவில்லை.

நாடாளுமன்ற தேர்தலில் விஜயகாந்தின் தேமுதிக கூட்டணி குறித்து என்ன முடிவெடுக்கும் என தெரியாத நிலையிலும் கட்சி சார்பில் தேர்தல் விண்ணப்பங்கள் வழங்கப்பட்டு வருகின்றன. இதுவரை 500க்கும் மேற்பட்டவர்கள் தேமுதிக சார்பில் போட்டியிட விரும்பி விண்ணப்பங்களை வாங்கி சென்றுள்ளனர்.

அவர்களிடம் இருந்து ரூ. 10 ஆயிரம் விண்ணப்ப கட்டணமாக வசூல் செய்யப்படுகிறது. தாழ்த்தப்பட்டவர்கள் விண்ணப்ப கட்டனமாக ரூ. 5 ஆயிரம் செலுத்தினால் போதும் என சலுகையும் வழங்கப்பட்டுள்ளது.

இந்நிலையில் விஜயகாந்த் கட்சி விண்ணப்பத்தில் ஜாதி பெயர் இருக்கக்கூடாது என உத்தரவிட்டாளர். அதன்படி தேமுதிக விண்ணப்பங்களில் ஜாதி விபரம் கேட்கப்படவில்லை. அதேபோல் வேட்பாளர்களின் சொத்து மதிப்பு கேட்கப்படவில்லை.

கல்வித் தகுதி, தமிழ் தவிர தெரிந்த மற்ற மொழிகள், வெற்றி வாய்ப்பு எப்படி? விஜயகாந்த் ரசிகர்மன்றத்தில் உறுப்பினரா? உறுப்பினர் எண், மன்ற வளர்ச்சிக்கு ஆற்றிய பணி, தற்போது கழகத்தில் உள்ள பொறுப்பு, தங்கள் குடும்பத்தில் யாராவது எம்எல்ஏ, எம்.பி.யாக இருந்தார்களா? போன்ற 23 விபரங்கள் கேட்கப்பட்டுள்ளது.