புதுச்சேரி வருகிறார் ராகுல் காந்தி
புதுச்சேரி: புதுச்சேரியில் புதிய காங்கிரஸ் நிர்வாகிகளை தேர்வும் செய்யும் கட்சி தேர்தல் அடுத்த மாதம் நடக்கிறது. இதற்கான பணிகளை பார்வையிட அக்கட்சியின் பொது செயலாளர் ராகுல் காந்தி விரைவில் புதுச்சேரி வர இருக்கிறார்.
புதுவையில் மாநில அளவில் இளைஞர் காங்கிரஸ் தேர்தல் நடைபெற உள்ளது. இதன் தேர்தல் அதிகாரியாக அகில இந்திய இளைஞர் காங்கிரஸ் நிர்வாகி அனில் தாமஸ் நியமிக்கப்பட்டுள்ளார்.
இந்நிலையில் புதுச்சேரி வந்த அனில்தாமஸ் நிருபர்களிடம் கூறுகையில்,
புதுச்சேரி மாநில இளைஞர் காங்கிரசுக்கு ஏப்ரல் 13, 14, மற்றும் 15ம் தேதிகளில் தேர்தல் நடைபெற உள்ளது. இதற்காக தற்போது உறுப்பினர் சேர்க்கை தீவிரமாக நடைபெற்று வருகின்றது.
எவ்வித அரசியல் நெருக்கடியும் இன்றி ஜனநாயக ரீதியில் புதிய நிர்வாகிகள் தேர்வு செய்யப்படுவார்கள். இதை முன்னிட்டு அகில இந்திய இளைஞர் காங்கிரஸ் பொதுச் செயலாளர் ராகுல்காந்தி புதுவை வர உள்ளார். ஆனால் அவர் வரும் தேதி குறித்து இறுதி முடிவு செய்யப்படவில்லை என்றார் அனில் தாமஸ்.