அதிமுக கூட்டணி- பாமக முடிவு?; அன்புமணி ராஜினாமா?

டெல்லி: அதிமுக கூட்டணியில் சேர பாமக முடிவு செய்துவிட்டதாகவும் விரைவிலேயே மத்திய அமைச்சரவையிலிருந்து டாக்டர் அன்புமணி விலகுவார் என்றும் கூறப்படுகிறது.

திமுக கூட்டணிக்கு பாமகவை இழுக்க திமுக, காங்கிரஸ் கட்சிகள் தீவிரமாக முயன்று வந்தாலும் ராமதாஸை அதிமுக பக்கம் கொண்டு செல்ல மதிமுக பொதுச் செயலாளர் வைகோ பெரும் முயற்சி எடுத்து வருகிறார்.

இதன் அடிப்படையில் அதிமுகவுடன் பாமகவுக்கு டீல் நடந்துவிட்டதாகவும் தகவல்கள் வருகின்றன. பாமகவுக்கு 7 மக்களவைத் தொகுதிகள், ஒரு ராஜ்யசபா சீட் தர அதிமுக ஒப்புக் கொண்டுவிட்டதாகவும் இதனால் அவர்களுடனேயே கூட்டணி அமைக்க டாக்டர் ராமதாஸ் திட்டமிட்டுள்ளதாகவும் கூறப்படுகிறது.

ஸ்ரீபெரும்புதூர், அரக்கோணம், திருவண்ணாமலை, தர்மபுரி, கள்ளக்குறிச்சி, சிதம்பரம், புதுச்சேரி ஆகிய தொகுதிகளை பாமகவுக்கு அதிமுக ஒதுக்கியுள்ளதாகத் தெரிகிறது.

பாமக பொதுக் குழு 26ம் தேதி காலை கூடுகிறது. இதில் கூட்டணி பற்றிய அறிவிப்பை டாக்டர் ராமதாஸ் வெளியிடுவார் என்கிறார்கள்.

இருப்பினும் ராமதாஸை எப்படியாவது கூட்டணியில் நீடிக்கச் செய்ய காங்கிரஸ் இறுதிக் கட்ட முயற்சிகளில் தீவிரமாக இறங்கியுள்ளது.

இந் நிலையில் மத்திய நலத்துறை அமைச்சர் அன்புமணி இன்று காலை டெல்லி புறப்பட்டுச் சென்றார். அதே போல தமிழக காங்கிரஸ் தலைவர் தங்கபாலுவும், ராமதாசின் சம்பந்தியான முன்னாள் மாநில காங்கிரஸ் தலைவர் கிருஷ்ணசாமி ஆகியோரும் டெல்லி விரைந்துள்ளனர்.

இன்று மாலை சோனியாவின் அரசியல் செயலாளர் அகமத் படேலை அன்புமணி சந்தித்துப் பேசுவார் என்று தெரிகிறது. அப்போது தங்கபாலு, கிருஷ்ணசாமி ஆகியோரும் படேலுடன் இருப்பர்.

இந்தப் பேச்சுவார்த்தையில் உடன்பாடு ஏற்படாவிட்டால் தனது மத்திய அமைச்சர் பதவிகளை அன்புமணியும், ரயில்வேத்துறை இணையமைச்சர் வேலுவும் ராஜினாமா செய்துவிட்டுத் திரும்புவர் என்று தெரிகிறது.

காங்கிரஸ்-திமுக கூட்டணியில் பாமக நீடிக்க வேண்டும் என போராடிக் கொண்டிருப்பவர் அன்புமணி என்பது குறிப்பிடத்தக்கது.