ராமதாஸை இழுக்க திருமாவளவன் இறுதி முயற்சி!

சென்னை: பாமக நிறுவனர் டாக்டர் ராமதாஸை, விடுதலைச் சிறுத்தைகள் கட்சித் தலைவர் திருமாவளவன் சந்தித்துப் பேசினார். திமுக கூட்டணியில் சேருமாறு பாமகவை அவர் வலியுறுத்தியதாகத் தெரிகிறது.

முன்னதாக நேற்று மாலை திமுக கூட்டணியில் சேர பாமக முடிவெடுத்து விட்டதாக வேகமாக தகவல் பரவ ஆரம்பித்தது.

டாக்டர் ராமதாஸை, காங்கிரஸ் தலைவர் தங்கபாலு சந்தித்ததாகவும், அவரிடம் திமுக 6 தொகுதிகள் தரும், நாங்கள் எங்களுக்குத் தரும் 2 தொகுதிகளைத் தருகிறோம் என்று கூறியதாகவும், இதற்கு ராமதாஸ் ஒப்புக் கொண்டதாகவும் தகவல்கள் வெளியாகின. ஆனால் இதை தங்கபாலு பின்னர் மறுத்தார்.

இந் நிலையில் டாக்டர் ராமதாஸை, விடுதலைச் சிறுத்தைகள் கட்சித் தலைவர் தொல்.திருமாவளவன் நேற்று மாலை சந்தித்தார். அவருடன் கட்சி எம்.எல்.ஏ ரவிக்குமாரும் உடன் சென்றிருந்தார். ராமதாஸுடன் நீண்ட நேரம் திருமாவளவன் ஆலோசனை நடத்தினார்.

அப்போது திமுக கூட்டணிக்கு வர ராமதாஸ் சில நிபந்தனைகளைப் போட்டதாகவும் இதை திமுகவிடம் திருமாவளவன் தெரிவித்ததாகவும் கூறப்படுகிறது.

இந்த நிபந்தனைகளுக்கு திமுக உடன்பட்டால் கூட்டணிக்குத் திரும்ப பாமக தயார் என்று தெரிகிறது. ஆனால், நிபந்தனைகளை ஏற்க திமுக தயாராக இல்லை என்றும் கூறப்படுகிறது. இதனால் பாமக, அதிமுக பக்கம் போவதை தடுக்க முடியாது என்கிறார்கள்.

இருப்பினும் பாமகவை எப்படியாவது திமுக கூட்டணிக்குள் கொண்டு வர கடும் முயற்சிகளில் இறங்கியுள்ளார் திருமா. அதேபோல டெல்லியிலும் பாமகவை அதிமுக பக்கம் போய் விடாமல் தடு்க்க காங்கிரஸ் தலைவர்கள் பெரும் முயற்சியில் ஈடுபட்டுள்ளனர்.