முன்னாள் எம்எல்ஏ ஆஸ்டின் குமரி தேமுதிக வேட்பாளர்

கன்னியாகுமரி: ராஜ்யசபா உறுப்பினராக, சட்டசபை உறுப்பினராக இருந்த, அனுபவம் வாய்ந்த அரசியல்வாதியான எஸ்.ஆஸ்டின், தேமுதிக வேட்பாளராக கன்னியாகுமரியில் களம் புகுந்துள்ளார்.

கன்னியாகுமரி தொகுதி தேமுதிக வேட்பாளராக அறிவிக்கப்பட்டுள்ள எஸ்.ஆஸ்டினின் சொந்த ஊர் கன்னியாகுமரி மாவட்டம் பொட்டலை அடுத்துள்ள சீயோன்புரம்.

பிறந்த தேதி 30-01-1959. தந்தை பெயர் எஸ்,சாமுவேல். ஓய்வு பெற்ற என்ஜீனியர். தாய் பெயர் கிரேஸ்லைட்.

ஆஸ்டின் திருமணம் ஆகாதவர். எம்ஏ பொருளாதாரம் படித்துள்ளார்.

1986ம் ஆண்டு அத்திகாட்டுவிளை பஞ்சாயத்து தலைவராக தேர்ந்தெடுக்கப்பட்டார்.

1992ம் ஆண்டு முதல் 1998ம் ஆண்டு வரை மேல்சபை எம்பியாக இருந்தார்.

நாகர்கோவில் சட்டசபைத் தொகுதியில், 2001ம் ஆண்டு எம்ஜிஆர் அதிமுக சார்பில் போட்டியிட்டு எம்எல்ஏவானார்.

கடந்த சட்டசபை தேர்தலில் சுயேச்சையாக போட்டியிட்டு தோல்வி அடைந்தார்.

பின்னர் அவர் தேமுதிகவில் இணைந்தார். தற்போது தேமுதிக மாநில துணை செயலாளராகவும், குமரி மாவட்ட தேமுதிக பொறுப்பாளராகவும் உள்ளார்.

குமரி மாவட்ட தேமுதிக பொறுப்பாளராக பதவி ஏற்றதும் ஒவ்வொரு பேரூராட்சி, ஓன்றியம், நகரம் வாரியாக நிர்வாகிகளை நியமித்தார். பல கட்சிகளை சேர்ந்தவர்களை தேமுதிகவில் இணைத்து கட்சியை வளர்த்து வருகிறார்.

சர்ச்சைகள் எதிலும் சிக்காதவர் ஆஸ்டின். மாவட்டத்தில் தனக்குள்ள சொந்த செல்வாக்கு மற்றும் விஜயகாந்த் என்ற மந்திரத்தின் செல்வாக்கு ஆகியவற்றை நம்பி கன்னியாகுமரி லோக்சபா தொகுதியின் முதல் உறுப்பினராகும் நம்பிக்கையில் களம் கண்டுள்ளார் ஆஸ்டின்.