புதுச்சேரியில் பாமக சார்பில் பேராசிரியர் ராமதாஸ் போட்டி

சென்னை: புதுச்சேரி மக்களவைத் தொகுதியில் பாமக சார்பில் தற்போதைய எம்.பி. பேராசிரியர் ராமதாஸ் போட்டியிடுவார் என அறிவிக்கப்பட்டுள்ளது.

அதிமுக கூட்டணியில் இடம் பெற்றுள்ள பாமக, புதுச்சேரி உள்பட 7 தொகுதிகளில் போட்டியிடுகிறது.

இதில் புதுச்சேரி தொகுதிக்கான வேட்பாளரை கட்சி நிறுவனர் டாக்டர் ராமதாஸ் அறிவித்துள்ளார். அதன்படி தற்போதைய எம்.பியான பேராசிரியர் ராமதாஸே மீண்டும் புதுச்சேரியில் போட்டியிடுவதாக ராமதாஸ் அறிவித்துள்ளார்.

கடந்த 2004ம் ஆண்டு நடந்த தேர்தலில் முதல் முறையாக புதுச்சேரி தொகுதியில், திமுக, காங்கிரஸ் ஆதரவுடன் பாமக போட்டியிட்டது. ராமதாஸ் போட்டியிட்டு வெற்றி பெற்றார்.

பாமகவின் பொருளாதார நிபுணராக கருதப்படுபவர் பேராசிரியர் ராமதாஸ். அவரது நேரடி மேற்பார்வையின் கீழ்தான் பாமகவின் கொள்கைகள், மாதிரி பட்ஜெட்டுகள், தேர்தல் அறிக்கைகள் உள்ளிட்டவை தயாரிக்கப்படுவது வழக்கம்.

இந்த நிலையில் 2வது முறையாக பேராசிரியர் ராமதாஸ் புதுச்சேரி எம்.பி. தேர்தலில் போட்டியிடுகிறார்.