புதுச்சேரியில் பாமக எம்.பி. ராமதாஸுக்கு மீண்டும் சீட்

புதுச்சேரி: பழுத்த கல்வியாளர், சீரிய சிந்தனையாளர், பாமகவின் கொள்கை வகுப்பாளர், முக்கிய கொள்கை முடிவுகளில் முக்கியப் பங்கு வகிப்பவர் என பன்முகம் கொண்ட பேராசிரியர் ராமதாஸ், புதுச்சேரி பாமக வேட்பாளராக மீண்டும் போட்டியிடுகிறார்.

புதுச்சேரி மாநில பாமக செயலாளராக இருப்பவர் பேராசிரியர் ராமதாஸ். புதுச்சேரி தாகூர் கல்லூரியில் முன்பு பேராசிரியராகப் பணியாற்றினார். பின்னர் புதுச்சேரி மத்திய பல்கலைக்கழகத்திலும் பணியாற்றினார். மொத்தமாக 33 ஆண்டுகள் கல்விப் பணியில், பேராசிரியர் பணியில் இருந்த பழுத்த கல்வியாளர்.

பொருளாதாரம், அரசியல், சமூகவியல் என பல துறைகளில் நிரம்பிய ஞானம் கொண்டவர். பாமகவின் கொள்கைகள் வகுப்பு, பிரபலமான நிழல் பட்ஜெட்டுகள், பொருளாதார அறிக்கைகள், திட்டங்கள் உள்ளிட்டவற்றை தீட்டுவதில் பின்புலமாக இருப்பவர் பேராசிரியர் ராமதாஸ்தான்.

திமுகவுக்கு அன்பழகன், எங்களுக்கு ராமதாஸ் என்று பாமகவினரால் பெருமிதத்துடன் கூறப்படுபவர் பேராசிரியர் ராமதாஸ்.

புதுச்சேரி எம்.பியாக தற்போது இருந்து வரும் ராமதாஸுக்கு மீண்டும் சீட் கொடுத்துள்ளார் டாக்டர் ராமதாஸ்.

கடந்த முறை பாமகவுக்கு புதுச்சேரியைக் கேட்டபோதே அதற்கு காங்கிரஸ் கடுமையாக எதிர்ப்பு தெரிவித்தது. இருப்பினும் கருணாநிதியின் சிபாரிசின் பேரில், சோனியா காந்தியிடம் போராடி இந்த சீட்டைப் பெற்றார் டாக்டர் ராமதாஸ்.

இருப்பினும் கடைசி வரை காங்கிரஸார் முரண்டு பிடித்தவண்ணமே இருந்தனர். ஒரு வழியாக அவர்களை சமாதானப்படுத்தி தேர்தலில் பாமக வெற்றி பெற்றது.

இந்த முறை அதிமுக அணியில் இருக்கிறது பாமக. காங்கிரஸ் கட்சியின் பாரம்பரிய தொகுதி புதுச்சேரி. எனவே இந்த முறை அங்கு வெல்லப் போவது யார் என்பது புதுச்சேரி மக்களைப் போலவே, தமிழக மக்களுக்கும் கூட ஆர்வம் அதிகமாகவே உள்ளது.