திருமாவளவனை எதிர்க்கும் தேமுதிகவின் சசிக்குமார்

சிதம்பரம்: விடுதலைச் சிறுத்தைகள் கட்சியின் தலைவர் தொல். திருமாவளவன் போட்டியிடுவார் என கருதப்படும் சிதம்பரம் தொகுதியில் அவரை எதிர்த்து கல்லூரியில் இளநிலை உதவியாளராக இருக்கும் சபா. சசிக்குமார் தேமுதிக சார்பில் மோதவுள்ளார்.

தேமுதிகவின் சிதம்பரம் தனி தொகுதி வேட்பாளர் சபா. சசிக்குமார். 32 வயதுதான் ஆகிறது. பி.எஸ்.சி, பின்னர் எம்.பி.ஏ என நிறையப்படித்தவர்.

அண்ணாமலைப் பல்கலைக்கழகத்தின் மருத்துவக் கல்லூரியில் இளநிலை உதவியாளராக இருக்கிறார்.

கடலூர் தெற்கு மாவட்ட தேமுதிக துணைச் செயலாளராக கட்சிப் பொறுப்பில் இருக்கிறார்.

சிதம்பரம் தொகுதியில்தான் திருமாவளவன் போட்டியிடவுள்ளார். அவரை எதிர்த்து மோதும் பெருமை சசிக்குமாருக்குக் கிடைத்துள்ளது.

தலித் மக்களின் ஹெவிவெயிட்டான திருமாவை எதிர்த்துப் போட்டியிடுவதால் சசிக்குமார் மீதும் கவன வெளிச்சம் படிந்துள்ளது.

அதேசமயம், இத்தொகுதியில் பாமகவும் போட்டியிடுகிறது. அக்கட்சியின் சார்பில் முன்னாள் மத்திய அமைச்சர் பொன்னுச்சாமி போட்டியிடலாம் என்கிறார்கள்.

எனவே இரு பெரும் தலைகளை எதிர்த்து மோதும் சபா, இருவருக்கும் நெருக்கடியைக் கொடுப்பாரா என்ற எதிர்பார்ப்பு அதிகரித்துள்ளது.