தமிழகத்தில் காங்-பாமக நேரடி மோதல் இல்லை

சென்னை: இரு வேறு கூட்டணிகளில் இருந்தாலும், காங்கிரஸ் கட்சியும், பாமகவும் தமிழகத்தில் நேரடியாக ஒரு தொகுதியிலும் மோதலவில்லை. அதேசமயம், புதுச்சேரியில் இரு கட்சிகளும் நேரடிப் போட்டியில் இறங்கியுள்ளன.

தமிழகத்தில் திமுக கூட்டணியில் இடம் பெற்றுள்ள காங்கிரஸ் கட்சிக்கு 16 தொகுதிகள் ஒதுக்கப்பட்டுள்ளன.

அதேபோல அதிமுக கூட்டணியில் இடம் பெற்றுள்ள பாமகவுக்கு 7 சீட் தரப்பட்டுள்ளது.

இரு கட்சிகளுக்கு இடையேயும் தமிழகத்தில் நேரடி மோதல் எதுவும் இல்லை. ஆனால் புதுச்சேரியில் மட்டும் இரு கட்சிகளும் நேரடிப் போட்டியில் மோதுகின்றன.

திமுகவுடன் 5 தொகுதிகளில் மோதல்..

இருப்பினும் திமுகவுக்கும், பாமகவுக்கும் இடையே ஐந்து தொகுதிகளில் நேரடிப் போட்டி நிலவுகிறது.

தர்மபுரி, ஸ்ரீபெரும்புதூர், அரக்கோணம், திருவண்ணாமலை, கள்ளக்குறிச்சி ஆகிய தொகுதிகளில் இரு கட்சிகளும் நேரடியாக மோதுகின்றன.

சிறுத்தைகளுடன் ஒரு தொகுதியில் மோதல்..

விடுதலைச் சிறுத்தைகள் இரு தொகுதிகளில் போட்டியிடுகின்றன. இதில் சிதம்பரம் தொகுதியில் மட்டும் பாமகவுடன் நேரடி மோதல் வருகிறது.

சிபிஐ-திமுக 2 தொகுதிகளில் மோதல்..

இந்திய கம்யூனிஸ்ட் கட்சிக்கு ஒதுக்கப்பட்டுள்ள வட சென்னை, நாகப்பட்டனம் ஆகிய தொகுதிகளில் திமுகவுடன் நேரடி மோதல் ஏற்பட்டுள்ளது.

அதேசமயம் தென்காசி தொகுதியில், காங்கிரஸுடன் மோதல் ஏற்பட்டுள்ளது.