காங். கோட்டை புதுவையில் முத்திரை பதிப்பாரா தேமுதிகவின் அசனா?

புதுச்சேரி: அதிமுகவில் இருந்து, தேமுதிகவில் சேர்ந்து, காங்கிரஸ் கோட்டையான புதுச்சேரியில் வேட்பாளராகியுள்ளார் அசனா.

55 வயதாகும் அசனா, காரைக்காலைச் சேர்ந்தவர். புதுச்சேரிக்கும், காரைக்காலும் நீண்ட காலமாகவே முட்டல் மோதல்தான்.

காரைக்காலை புதுச்சேரி அரசு புறக்கணித்து வருகிறது. எனவே காரைக்காலை தனி யூனியன் பிரதேசமாக அறிவிக்க வேண்டும் என அங்கு நீண்ட காலமாக போராட்டங்களும் நடந்து வருகின்றன.

அப்படிப்பட்ட காரைக்காலைச் சேர்ந்த அசனா, முன்பு அதிமுகவில் இருந்தவர். விஜயகாந்த்தின் கொள்ககைகள், அவரது அரசியல் ஸ்டைலால் கவரப்பட்டு தேமுதிகவில் இணைந்தார்.

புதுவை மாநில தேமுதிக துணைச் செயலாளராக பொறுப்பு வகித்து வரும் அசனா, புதுச்சேரி காங்கிரஸ் கோட்டையாக இருந்தாலும் கூட அங்கு சலசலப்பை ஏற்படுத்த முடியும் என்ற நம்பிக்கையுடன் உள்ளார்.

தமிழகத்தைப் போலவே, புதுச்சேரி லோக்சபா தேர்தலிலும் முதல் முறையாக தேமுதிக போட்டியிடுகிறது. அந்த வகையில், புதுவை மாநில தேமுதிகவின் முதல் லோக்சபா வேட்பாளர் என்ற பெருமை அசனாவுக்குக் கிடைத்துள்ளது.