மாஜி அதிமுக எம்பி தாமோதரன் தேமுதிக எம்பி ஆவாரா?

கடலூர்: கடலூர் தொகுதியின் தேமுதிக வேட்பாளராக களம் கண்டுள்ளார் எம்.சி. தாமோதரன்.

தேமுதிக வேட்பாளர்களில் அனுபவம் வாய்ந்த சிலரில் இவரும் ஒருவர். காரணம் இவர் இருந்த கட்சி அப்படி.

அதிமுக சார்பில் 1991ம் ஆண்டு நெல்லிக்குப்பம் சட்டசபைத் தொகுதியில் வெற்றி பெற்று அமைச்சராகவும் நியமிக்கப்பட்டார்.

பின்னர் 1999ம் ஆண்டு அதிமுக சார்பில் கடலூர் தொகுதி எம்.பியாக தேர்ந்தெடுக்கப்பட்டவர்.

பின்னர் அதிமுக மேலிடம் இவரை ஓரம் கட்ட இவரும் தேமுதிகவுக்கு வந்து சேர்ந்தார்.

58 வயதாகும் தாமோதரன் பி.எஸ்.சி., பி.எல் படித்தவர். வழக்கறிஞர். மேல் குமாரமங்கலத்தைச் சொந்த ஊராகக் கொண்டவர்.

அமைச்சராக, எம்.எல்.ஏவாக, எம்.பியாக இருந்தவர், அதிமுகவில் இருந்தவர் என்பதால் இவர் மீதான எதிர்பார்ப்பு அதிகம் உள்ளது. இருப்பினும் விஜயகாந்த்தின் பிரசாரமும், அவர் மீதான மக்களின் நம்பிக்கையும், எதிர்பார்ப்புமே தன்னை வெற்றி பெற வைக்கும் என நம்புகிறார் தாமோதரன்.