சிதம்பரம்: பாமக வேட்பாளர் பொன்னுச்சாமி-திருமாவை எதிர்கொள்வார்

சென்னை: சிதம்பரம் தனி தொகுதியில் பாமக சார்பில் மீண்டும் பொன்னுச்சாமியே போட்டியிடுவார் என அக்கட்சி அறிவித்துள்ளது.

அதிமுக கூட்டணியில் பாமகவுக்கு 7 தொகுதிகள் ஒதுக்கப்பட்டுள்ளன. இதில் சிதம்பரம் தொகுதியைத் தவிர மற்ற தொகுதிகளுக்கான வேட்பாளர்களை பாமக அறிவித்து விட்டது.

சிதம்பரம் தொகுதியில் விடுதலைச் சிறுத்தைகள் கட்சித் தலைவர் திருமாவளவன் போட்டியிடவிருப்பதால் அங்கு வலுவான வேட்பாளரை நிறுத்த பாமக பரிசலித்து வந்தது. இதனால் அங்கு சட்டுப்புட்டென்று வேட்பாளரை அறிவிக்காமல் இருந்தது.

இந்த நிலையில் தற்போது அங்கு எம்.பி.யாக உள்ள பொன்னுச்சாமி அங்கு மீண்டும் வேட்பாளராக அறிவிக்கப்பட்டுள்ளார்.

பொன்னுச்சாமி தவிர வேறு ஒருவரின் பெயரையும் பாமக பரிசீலித்து வந்தது. இருப்பினும் பொன்னுச்சாமியே சரியான வேட்பாளர் என்ற முடிவுக்கு பாமக வந்து தற்போது அவரை வேட்பாளராக அறிவித்துள்ளது.