அரசியல் திருநங்கை விஜயகாந்த்: திமுக மாணவரணி செயலாளர் புகழேந்தி
மயிலாடுதுறை: அரசியல் திருநங்கையாக தேமுதிக தலைவர் விஜயகாந்த் இருப்பதாக திமுக மாணவரணி செயலாளர் புகழேந்தி கருத்து தெரிவித்துள்ளார்.
மயிலாடுதுறையில் திமுக சார்பில் பொதுக் கூட்டம் நடைபெற்றது. இதில் திமுக மாணவரணி மாநில செயலாளர் புகழேந்தி கலந்து கொண்டு பேசினார்.
அப்போது அவர் பேசுகையில் சமுதாயத்தில் ஆணும் இல்லை, பெண்ணும் இல்லை என்றால் அவர்களை திருநங்கைகள் என்று அழைக்குமாறு நமது முதல்வர் கருணாநிதி தெரிவித்துள்ளார்.
ஆனால் இதே திமுக ஆட்சியில் தான் திருநங்கைளுக்கு இதுவரை எந்த ஆட்சியிலும் இல்லாத அளவில் சலுகைகள் வழங்கப்பட்டு வருகின்றது.
திமுகவும் வேண்டாம், அதிமுகவும் வேண்டாம் மக்களோடு தான் கூட்டணி என்று தேமுதிக தலைவர் விஜயகாந்த் செல்லும் இடமெல்லாம் கூறி வருகின்றார்.
அரசியல் கட்சிகளில் தேமுதிக தலைவர் விஜயகாந்த் திருநங்கை போல் உள்ளார். இது சட்டசபை தேர்தல் அல்ல. எனவே விஜயகாந்த் ஓட்டுக்களை சிதறடிக்க வேண்டாம் என்றார்.
விஜயகாந்த்தை திருநங்கை என்று வர்ணித்து திமுக மாணவர் அணிச் செயலாளர் புகழேந்தி பேசியிருப்பது பரபரப்பை ஏற்படுத்தியுள்ளது.