'யூனியன்கள் அடம்பிடித்தால் பாஸ்டன் குளோப் மூடப்படும்' - நியூயார்க் டைம்ஸ்

நியூயார்க்: ஊழியர்களின் யூனியன்கள் ஒத்துழைக்காவிட்டால் தனது பாஸ்டன் குளோப் பத்திரிகையை மூடிவிடப் போவதாக நியூயார்க் டைம்ஸ் எச்சரிக்கை விடுத்துள்ளது.

அமெரிக்காவின் பிரபல பத்திரிகை நியூயாரக் டைம்ஸ். இதன் சகோதர பத்திரிகை தி பாஸ்டன் க்ளோப். இந்த பத்திரிகை ஊழியர்களுக்காக 13 யூனியன்கள் உள்ளன. அமெரிக்காவில் அதிகம் விற்பனையாகும் பத்திரிகைகளில் 14வது இடத்தில் உள்ளது குளோப்.

பொருளாதாக மந்தம் காரணமாக அமெரிக்காவின் அனைத்துப் பத்திரிகைகளும் கடும் நெருக்கடியைச் சந்தித்துள்ளன. குறிப்பாக விளம்பர வருவாய் பெருமளவு குறையத் துவங்கிவிட்டது.

இந்த சூழலில், குளோப் பத்திரிகையின் இந்த ஆண்டு நஷ்டம் 85 மில்லியன் டாலர்களாக உயர்ந்துள்ளது. இனியும் இந்த நஷ்டம் தொடர்ந்தால் தாக்குப் பிடிக்க முடியாது என்பதால் வேலைக் குறைப்பு, சம்பளம் மற்றும் சலுகைகள் குறைப்பு என பல கடும் நடிவடிக்கைகளில் இறங்க நியூயார்க் டைம்ஸ் முடிவு செய்துள்ளது.

இந்த நடவடிக்கை மூலம் மொத்தம் 20 மில்லியன் டாலர் அளவுக்கு மிச்சப்படுத்த நியூயார்க் டைம்ஸ் முடி செய்தது. ஆனால் இதனை அறிவித்தபோது, ஊழியர்களின் யூனியன்கள் ஒப்புக் கொள்ள மறுத்துவிட்டன.

ஆனால் தங்களது இந்த முடிவை யூனியன்கள் ஒப்புக் கொள்ளாவிட்டால், உடனடியாக பாஸ்டன் குளோப்பை மூடுவதைத் தவிர வேறு வழியில்லை என்று நேற்று மிரட்டல் விடுத்துள்ளது நியூயார்க் டைம்ஸ் நிர்வாகம்.

பாஸ்டன் குளோப்பில் மட்டும் எடிட்டோரியல், விளம்பரம் மற்றும் விநியோகத்தில் 700 ஊழியர்கள் பணியாற்றுகின்றனர். அச்சகம், ஓட்டுநர்கள், நிர்வாகப் பிரிவுகளில் பணியாற்றுவோரைச் சேர்த்தால் 2000-ஐ நெருங்குகிறது.

இந்த நாளிதழ் தவிர, இன்னும் பல முன்னணி அமெரிக்க நாளிதழ்கள் 40 சதவிகிதம் வரை பணியாளர் குறைப்பு மற்றும் சம்பளக் குறைப்பில் இறங்கியுள்ளன.