கிருஷ்ணகிரி-ஜெவை வீழ்த்திய சுகவனம்..மீண்டும்!

கிருஷ்ணகிரி: பர்கூர் சட்டசபைத் தேர்தலில் அதிமுக பொதுச் செயலாளர் ஜெயலலிதாவை வீழ்த்தி சாதனை படைத்த சுகவனம், மீண்டும் கிருஷ்ணகிரி தொகுதியில் போட்டியிடுகிறார்.

காமராஜரை வீழ்த்தி பெரும் புகழ் பெற்றவர் அன்றைய மாணவர் சீனிவாசன். கிட்டத்தட்ட அதே ரேஞ்சில் புகழ் பெற்றவர் சுகவனம்.

1996ம் ஆண்டு பர்கூர் சட்டசபைத் தொகுதியில் போட்டியிட்ட ஜெயலலிதாவை யாரும் எதிர்பாராத வகையில் வீழ்த்தியவர் சுகவனம்.

பின்னர் கிருஷ்ணகிரி லோக்சபா தொகுதியில் கடந்த முறை போட்டியிட்டு வெற்றி பெற்றார். இம்முறை 2வது முறையாக சீட் தரப்பட்டுள்ளது.

இவரது சொந்த ஊர் பர்கூர் அருகே உள்ள எமக்கல்நத்தம் கிராமம். பர்கூரில் மருந்துக் கடை வைத்திருந்தார். இன்றும் அது இருக்கிறது. கூடவே விவசாயமும் பார்த்து வருகிறார்.

ஒருங்கிணைந்த தருமபுரி மாவட்ட இளைஞர் அணி துணை அமைப்பாளர், கிருஷ்ணகிரி மாவட்ட இளைஞர் அணி அமைப்பாளர் ஆகிய பொறுப்புகளை வகித்த இவர் இப்போது மாநில இளைஞர் அணி துணைச் செயலர்.

ஜெயலலிதாவை வீழ்த்தியவர் என்ற பெருமை மட்டுமே உள்ளது.