கன்னியாகுமரிக்கு பெண் வேட்பாளரை நிறுத்திய திமுக

கன்னியாகுமரி: காங்கிரஸார் கடும் போராட்டங்களை நடத்தி வந்த சூழ்நிலையில், கன்னியாகுமரிக்கு பெண் வேட்பாளரை அறிவித்துள்ளது திமுக.

பி.எஸ்.சி., பி.எட் படித்த ஆசிரியை ஹெலன் டேவிட்சன் குமரி தொகுதியின் வேட்பாளராகியுள்ளார்.

நாகர்கோவிலைச் சேர்ந்த ஹெலனின் கணவர் டேவிட்சன், நாகர்கோவில் நகர திமுக இளைஞர் அணி துணை அமைப்பாளராக இருக்கிறார்.

கிறிஸ்தவ நாடார் சமுதாயத்தைச் சேர்ந்தவர். 38 வயதாகும் ஹெலன், கடந்த 15 வருடங்களாக கட்சியில் செயல்பட்டு வருகிறார்.

கன்னியாகுமரி மாவட்ட மகளிர் தொண்டர் அணி அமைப்பாளராக 5 வருடங்களாக பணியாற்றி வருகிறார்.

கடலூரில் நடந்த தி.மு.க. மகளிர் மாநாட்டில் நடைபெற்ற பேரணியின் போது குமரி மாவட்ட தி.மு.க. சார்பில் சிறந்த அணிவகுப்பு மரியாதைக்காக சிறப்பு பரிசு பெற்றவர். அதுவே இவருக்கு சீட் கிடைக்கவும் வழி செய்துள்ளது.

குமரி காங்கிரஸார் குமுறலில் உள்ள நிலையில் ஹெலன் அதைத் தாண்டி வெற்றி பெறுவாரா என்பதை பொறுத்திருந்து பார்க்க வேண்டும்.