தங்கம் மீண்டும் சவரனுக்கு ரூ.96 குறைந்தது!

சென்னை: தங்கத்தின் விலையில் தொடர்ந்து நிலையற்ற தன்மை நிலவுகிறது. நேற்று ஒரு சவரனுக்கு ரூ.144 வரை தங்கத்தின் விலை உயர்ந்தது. ஆனால் இன்று ரூ.96 குறைந்துள்ளது.

சர்வதேச நிதியமைப்பு தனது இருப்பிலுள்ள தங்கத்தை தொடர்ந்து விற்பனை செய்து வருகிறது. இதனால் தொடர்ந்து தங்கம் விலை சரிவுக்குள்ளானது. மேலும் சர்வதேச முதலீட்டாளர்கள், மீண்டும் தங்கள் கவனத்தை பங்குச் சந்தைகள் பக்கம் திருப்பியதும் இதற்கு ஒரு காரணமாகும்.

ஆனால் நேற்று பங்குச் சந்தையில் எதிர்பாராத திடீர் சரி காணப்பட்டது. இதனால் மீண்டும் தங்கத்தில் முதலீடு அதிகரிக்கும் நிலை ஏற்பட்டதால் விலை உயர்ந்தது.

இப்போது மீண்டும் இறங்குமுகமாகிவிட்டது தங்கம் விலை.

நேற்று காலை ஒரு கிராம் தங்கத்தின் விலையில் 18 ரூபாய் அதிகரித்து, ரூ.1,359-க்கு விற்பனையானது. இன்று கிராமுக்கு ரூ.12 குறைந்து, ரூ.1347ஆக விற்கிறது. இன்றைய விலைப்படி சென்னையில் ஒரு பவுன் (8 கிராம்) தங்கத்தின் விலை ரூ.10,776 ஆக உள்ளது.