அதிமுகவின் நீண்ட கால தொண்டருக்கு பெரம்பலூர் சீட்

பெரம்பலூர்: அதிமுகவில் நீண்ட காலமாக பெரிய பொறுப்புகளில் இல்லாமல் இருந்து வரும் மருதை ராஜ், பெரம்பலூர் தொகுதியில் அதிமுக வேட்பாளராகியுள்ளார்.

பெரம்பலூர் மாவட்டம் ரங்கநாதபுரத்தைச் சேர்ந்தவர் ஆர்.பி.மருதை ராஜ். தந்தை பெயர் பெரியசாமி, தாயார் பெயர் கமலா. முத்தரையர் சமூகத்தைச் சேர்ந்தவர்.

1963ம் ஆண்டு பிறந்த இவர் எம்.எஸ்.சி படித்தவர். மனைவி பெயர் கலைச்செல்வி. பிரசன்னகுமார் என்ற மகனும், சுவாதிப் பிரியா என்ற மகளும் உள்ளனர்.

அதிமுகவில் ஈடுபடுவது தவிர ரியல் எஸ்டேட் தொழிலையும் கவனித்து வருகிறார்.

1980ம் ஆண்டு முதல் அதிமுகவில் தீவிரமாக செயல்பட்டு வருகிறார். ஒன்றிய மாணவரணி செயலாளராக இருந்தார். தற்போது ஒன்றிய இளைஞர் அணி செயலாளராக இருக்கிறார்.

கடந்த உள்ளாட்சித் தேர்தலில் பெரம்பலூர் ஒன்றிய கவுன்சிலர் பதவிக்கு போட்டியிட்டு தோல்வியைத் தழுவினார்.