அதிமுக வழியில் தேமுதிக-மதுரை வேட்பாளர் மாற்றம்

மதுரை: தேமுதிக சார்பில் மதுரையில் போட்டியிட இருந்த வேட்பாளர் முத்துலெட்சுமியை அக் கட்சியின் தலைவர் விஜய்காந்த் திடீரென மாற்றியுள்ளார்.

அவருக்கு பதிலாக கவியரசுவை வேட்பாளராக அறிவித்துள்ளது தேமுதிக. இவர் மதுரை மாவட்ட தேமுதிக அவைத் தலைவராக உள்ளார்.

தேமுதிக சார்பில் தமிழகத்தில் இரண்டு பெண் வேட்பாளர்கள் நிறுத்தப்பட்டிருந்தனர். சிவகங்கை தொகுதியில் மத்திய அமைச்சர் ப.சிதம்பரத்தை எதிர்த்து ரெஜினா பாப்பாவும், மதுரை தொகுதியில் முத்துலெட்சுமியும் நிறுத்தப்பட்டிருந்தனர்.

இந்தத் தொகுதியில் திமுக சார்பில் அழகிரி போட்டியிடவுள்ளார். இந்த அறிவிப்பையடுத்து வேட்பாளரை மாற்ற விஜய்காந்த் முடிவு செய்ததாகக் கூறப்படுகிறது.

மேலும் முத்துலட்சுமியே விலகிக் கொள்ள விரும்பியதாகவும் கூறப்படுகிறது. இதையடுத்து அவரை நீக்கிவிட்டு கவியரசுவை நிறுத்தியுள்ளார் விஜய்காந்த்.

வர்த்தகரான கவியரசு, ஆரம்ப காலத்தில் விஜயகாந்த் ரசிகர் மன்றத்தில் இருந்தவர். கேப்டன் நற்பணி மன்ற மாவட்ட இளைஞரணி செயலாளராக இருந்தவர்.

முத்துலட்சுமி வாபஸ் பெறப்பட்டதன் மூலம் தேமுதிக சார்பில் போட்டியிடும் ஒரே பெண் வேட்பாளர் ரெஜினா பாப்பா மட்டும் தான் என்ற நிலை உருவாகியுள்ளது.

இன்று அதிமுகவிலும் பெரம்பலூர், திருவள்ளூர் தொகுதி வேட்பாளர்கள் மாற்றப்பட்டது குறிப்பிடத்தக்கது.