மதுரை தேமுதிக வேட்பாளர் 'சாக்லெட்' கவியரசு

மதுரை: மதுரை தேமுதிக வேட்பாளராக அறிவிக்கப்பட்டுள்ள கவியரசு சாக்லெட் தயாரிப்பதற்கான மூல பொருட்களை விற்பனை செய்து வருபவர்.

தேமுதிக தலைவர் விஜயகாந்தின் அதிதீவிர ரசிகரான கவியரசு, கேப்டன் நற்பணி மன்றத்தின் மாவட்ட இளைஞரணி செயலாளராக பதவி வகித்தவர்.

இவருக்கு முன்னதாக அறிவிக்கப்பட்ட வேட்பாளர் முத்துலட்சுமி, திமுக சார்பில் அழகிரி களமிறங்கியதும் நீக்கப்பட்டார். மதுரை தொகுதியில் அழகிரிக்கு எதிராக பலமான வேட்பாளரை தேர்வு செய்ய நினைத்த விஜயகாந்துக்கு கவியரசு பெயர் நினைவுக்கு வந்திருக்கிறது. இதையடுத்து அவர் வேட்பாளராக நிறுத்தப்பட்டுள்ளார்.

தலைவர் விஜயகாந்த் தன் மீது வைத்திருக்கும் நம்பிக்கையை காப்பாற்றுவேன் என கவியரசு உற்சாகமாக பிரசாரத்தில் ஈடுபட்டு வருகிறார்.

முத்துலட்சுமியைப் போலவே யாதவ சமுதாயத்தை சேர்ந்த இவர் தற்போது மதுரை மாவட்ட தேமுதிக அவைத் தலைவராக இருக்கிறார். இவருக்கு கௌசல்யா என்ற மனைவியும். ஆஷிகா, அர்ச்சனா என்ற இரு மகள்களும் உள்ளனர்.