பாஜக-தந்தை குமரி அனந்தன் வழியில் எம்.பியாவாரா?

சென்னை: காங்கிரஸ் பாரம்பரியத்தைப் பின்பற்றும் குடும்பத்திலிருந்து வந்த தமிழிசை செளந்தரராஜன், பாஜகவின் முக்கிய வேட்பாளர்களில் ஒருவராக வட சென்னையில் களம் நிற்கிறார்.

காங்கிரஸ் மூத்த தலைவர்களில் ஒருவரான குமரி அனந்தனின் மகள்தான் டாக்டர் தமிழிசை. பாஜகவில் இணைந்து தீவிரமாக செயல்பட்டு வருபவர். சுறுசுறுப்பாக உழைத்து, அந்த உழைப்பால் இன்று மாநில பொதுச் செயலாளர் பதவிக்கு உயர்ந்துள்ளார்.

1999ம் ஆண்டு முதல் பாஜகவில் தீவிரமாக பணியாற்றி வருகிறார். இவரது கணவர் செளந்தரராஜனும் ஒரு டாக்டர் ஆவார்.

சிறந்த பேச்சாளர். தந்தை குமரி அனந்தன் காங்கிரஸ் முன்னாள் தலைவர். சித்தப்பா வசந்தகுமார் காங்கிரஸ் வர்த்தகப் பிரிவு தலைவர். என்றபோதிலும், தனது வழியில் பாஜகவில் தீவிரமாக செயல்பட்டு வரும் தமிழிசை செளந்தரராஜன் முதல் முறையாக தேர்தல் களத்தில் குதித்துள்ளார்.

வட சென்னையில் போட்டியிடும் தமிழிசை, அங்கு பாஜகவுக்கு நிச்சயம் வெற்றி என்று உறுதியுடன் கூறுகிறார்.

'தமிழிசை' லோக்சபாவை எட்டுமா என்பதை பொறுத்திருந்து பார்ப்போம்..