இன்போசிஸ்: 4வது காலாண்டு லாபம் குறைந்தது!

மும்பை: உலகப் பொருளாதார மந்தம், விலை குறைவு போன்றவை காரணமாக இன்போசிஸ் நிறுவனத்தின் நான்காவது காலாண்டு நிகர லாபம் லேசாகக் குறைந்துள்ளது. அதேநேரம் மார்ச் 2009 நிதியாண்டுக்கான நிகர லாபம் 28.53 சதவிகிதம் உயர்ந்துள்ளது.

இந்த காலாண்டில் நிகர லாபமாக ரூ.1613 கோடியை ஈட்டியுள்ள இன்போசிஸ், இதே கால கட்டத்தில் கடந்த ஆண்டு ரூ.1,641 கோடியை ஈட்டியது.

இன்போசிஸ் நிறுவனத்தின் மொத்த வருவாய் இந்த காலாண்டில் ரூ.5,635 கோடி. இதே கால கட்டத்தில் கடந்த ஆண்டு இன்போசிஸ் ஈட்டிய வருவாய் ரூ.5786 கோடி.

'சர்வதேச அளவில் விலை நிலை மோசமாக சரிந்து வருகிறது. அதைச் சமாளிக்கும் விதத்தில் பல்வேறு செலவுக் குறைப்பு நடவடிக்கைகளை மேற்கொள்ள வேண்டியுள்ளது', என்று இன்போசிஸ் சிஇஓ கோபால கிருஷ்ணன் அறிவித்துள்ளார்.