டாப் பெண் சிஇஓ: இந்திரா நூயிக்கு 4 வது இடம்

வாஷிங்டன்: உலகின் டாப் 15 பெண் சிஇஓக்களில் இந்தியாவில் பிறந்து அமெரிக்காவில் செட்டிலான இந்திரா நூயிக்கு 4-வது இடம் கிடைத்துள்ளது. சர்வதேச அளவில் டாப் பிராண்டான பெப்ஸிகோவின் தலைமைச் செயல் அலுவலர் இவர்.

அமெரிக்காவின் பிரபல பத்திரிகையான பார்ச்சூன் 500 இந்தப் பட்டியலை வெளியிட்டுள்ளது.

2006-ல் பெப்ஸிகோ சிஇஓவாகப் பொறுப்பேற்ற நூயி, இரண்டு ஆண்டுகளில் நிறுவனத்தின் வருவாயை 10 சதவிகிதம் உயர்த்தியுள்ளதாக இந்தப் பத்திரிகை தெரிவித்துள்ளது.

அதேபோல, குளிர்பானத்தில் நச்சுப் பொருள்கள் கலந்திருப்பதாக பிரச்சினை ஏற்பட்ட போதும், அதிக கலோரி இருப்பதாகக் கூறப்பட்ட சூழலிலும் அவற்றை திறமையாகச் சமாளித்து, புதிய தரக் கட்டுப்பாட்டுக்கேற்ப குளிர்பானங்களைத் தயாரிக்கக் காரணமாக இருந்தவர் நூயி என அந்தப் பத்திரிக்கை குறிப்பிட்டுள்ளது.

பெப்ஸி தனது 3500 ஊழியர்களை நீக்கி, 6 கிளைகளை மூட வேண்டிய நிர்பந்தத்துக்கு வந்தபோது, இந்தியா, சீனா மற்றும் மெக்ஸிகோவில் புதிய முதலீடுகளை அறிவித்தவர் நூயி.

அடுத்த மூன்று ஆண்டுகளில் பெப்ஸி மற்றும் மவுண்டைன் ட்யூ விற்பனை மேம்பாட்டுக்காக 1.2 பில்லியன் டாலர் அளவு செலவு செய்யும் திட்டமிருப்பதாகவும் நூயி அறிவித்துள்ளார்.