காங்கிரஸ் வேட்பாளரை அடித்து, உதைத்த திமுக செயலாளர்!

பண்ருட்டி: காங்கிரஸ் வேட்பாளர் கே.எஸ்.அழகிரியை திமுக ஒன்றியச் செயலாளர் ஒருவர் நடு ரோட்டில் சட்டையை பிடித்து இழுத்து அடித்து, உதைத்தார்.

கடலூர் நாடாளுமன்றத் தொகுதியில் காங்கிரஸ் வேட்பாளராக கே.எஸ்.அழகிரி போட்டியிடுகிறார்.

பண்ருட்டியில் இவருக்காக அண்ணா கிராம ஒன்றிய திமுக செயலாளர் வெங்கட்ராமன் தலைமையில் திமுகவினர் பிரச்சாரத்துக்குச் சென்றனர்.

வேட்பாளர் அழகிரியும் காங்கிரஸ் தொண்டர்களுடன் வந்து இவர்களுடன் பிரச்சாரத்துக்குச் அழைத்துச் சென்றார்.

அப்போது அழகிரிக்கும் வெங்கட்ராமனுக்கும் இடையே தேர்தல் செலவு விஷயத்தில் வாக்குவாதம் ஏற்பட்டது. இது திடீரென கைகலப்பாக மாறியது.

அப்போது நடு ரோட்டில் காங்கிரஸ் வேட்பாளர் அழகிரியை சட்டையை பிடித்து இழுத்து அடித்து உதைத்தார் திமுக ஒன்றியச் செயலாளர் வெங்கட்ராமன்.

இதையடுத்து அங்கிருந்த திமுக மற்றும் காங்கிரசை சேர்ந்த 200க்கும் மேற்பட்ட தொண்டர்களுக்கு இடையிலும் அடிதடி ஏற்பட்டது. சென்னை-கும்பகோணம் சாலையில் ஒருவரை ஒருவர் விரட்டி விரட்டி அடித்துக் கொண்டனர். வேட்டிகளை உருவிக் கொண்டு அரை நிர்வாணமாக அடிதடி நடந்தது.

இந்த விவகாரத்தால் ஒரு மணி நேரத்திற்கு அந்த பகுதியில் போக்குவரத்து பாதிக்கப்பட்டது. இந்த மோதலில் பலருக்கும் ரத்தக் காயம் ஏற்பட்டது.

சம்பவம் குறித்து தகவல் அறிந்த காவல்துறை துணைக் கண்காணிப்பாளர் அருளரசு இரு தரப்பிடமும் பேசி சமாதானம் செய்தார்.

அப்போது வெங்கட்ராமன், காங்கிரஸ் வேட்பாளர் அழகிரியை நடுரோட்டில் வைத்து கெட்ட வார்த்தைகளால் திட்டித் தீர்த்து விட்டு சென்றார்.