ஜெட் ஊழியர்களுக்கு 25 சதவீத சம்பளம் கட்!

மும்பை: நஷ்டம் காரணமாக 500க்கும் மேற்பட்ட ஊழியர்களை சில தினங்களுக்கு முன் நீக்கிய ஜெட் ஏர்வேஸ் நிறுவனம், இப்போது பணியிருக்கும் ஊழியர்களின் சம்பளத்திலும் கை வைத்துள்ளது.

செலவுக் குறைப்பு நடவடிக்கையாக, நிறுவனத்தின் மூத்த அதிகாரிகளுக்கு 25 சதவீத சம்பளக் குறைப்பை உடனடியாக அமலுக்குக் கொண்டு வருவதாக ஜெட் நிர்வாகம் நேற்று தெரிவித்தது. ரூ.5 லட்சம் வரை சம்பளம் வாங்கும் உயர் அதிகாரிகளுக்கு 20 சதவீத சம்பளம் குறைக்கப்படும்.

தாங்க முடியாத அளவு நிதி நெருக்கடி மற்றும் நஷ்டத்தை நிறுவனம் தொடர்ந்து சந்தித்து வருவதால், ஜெட் ஏர்வேஸ் நிர்வாகம் இந்த முடிவுக்கு வந்துள்ளது. ஊழியர்கள் புரிந்து கொள்வார்கள் என நம்புவதாக நிறுவனத்தின் தரப்பில் தெரிவிக்கப்பட்டுள்ளது.

இதன்படி மாதத்துக்கு ரூ.75,000 சம்பளம் வாங்கும் ஊழியர்களுக்கு அதில் ரூ.18250 வரை குறைக்கப்படும். மேலும் அவர்களுக்குத் தரப்பட்டு வந்த பல்வேறு அலவன்ஸ்கள், கார் செலவு, பராமரிப்புச் செலவு, செல்போன் செலவு மற்றும் ஊக்க தொகைகள் மே முதல் தேதியிலிருந்து முற்றிலுமாக நிறுத்தப்படும்.

இந்த நடவடிக்கை தற்காலிகமானது என்றும், நிலைமை சீரடைந்ததும் மீண்டும் பழைய சலுகைகள், சம்பளம் வழங்கப்படும் என்றும் நிர்வாகம் தெரிவித்துள்ளது.