தமிழகத்திலேயே பணக்கார வேட்பாளர் சாருபாலா!

சென்னை: தமிழக வேட்பாளர்களிலேயே மிகப் பெரிய பணக்கார வேட்பாளர் என்ற பெருமை திருச்சி தொகுதி காங்கிரஸ் வேட்பாளர் சாருபாலா தொண்டமானுக்குக் கிடைத்துள்ளது.

சாருபாலா தொண்டமான் ஜமீன் குடும்பத்தைச் சேர்ந்தவர். புதுக்கோட்டை சமஸ்தானம்தான் இவரது சொந்த ஊர். திருச்சி காங்கிரஸ் வேட்பாளராக சாருபாலா நிறுத்தப்பட்டுள்ளார்.

இவர் தனது சொத்து மதிப்பு ரூ. 56.62 கோடி என காட்டியுள்ளார்.

இதுவரை வேட்பு மனு தாக்கல் செய்த எந்த வேட்பாளருக்கும் இந்த அளவுக்கு சொத்து இல்லை.

மத்திய அமைச்சர் ப.சிதம்பரத்தின் சொத்து மதிப்பு ரூ. 27 கோடியாகும். அதேபோல கோவை தொகுதி காங்கிரஸ் வேட்பாளர் ஆர்.பிரபுவிடம் மட்டுமே பி.எம்.டபிள்யூ கார் உள்ளது என்பது குறிப்பிடத்தக்கது.

மேயர் பதவி ராஜினாமா:

இதற்கிடையே தனது திருச்சி மாநகராட்சி மேயர் பதவியை சாருபாலா தொண்டைமான் ராஜினாமா செய்துள்ளார். தேர்தல் போட்டியிடுவதால் தனது மேயர் பதவியை அவர் ராஜினாமா செய்துள்ளார்.

10 ஆயிரம் 1 ரூபாய் நாணயங்களுடன் தந்த வேட்பாளர்:

இதற்கிடையே தென்சென்னையி்ல் வேட்புமனு தாக்கல் செய்ய வந்த சுயேட்சை வேட்பாளர் ஒருவர் வைப்பு தொகைக்கான ரூ. 10 ஆயிரத்தையும் 1 ரூபாய் நாணயங்களாக கொண்டு வந்த பரபரப்பை ஏற்படுத்தினர். அவர் கொண்டு வந்த பணத்தை தேர்தல் அதிகாரிகள் சுமார் ஒன்றரை மணி நேரம் உட்கார்ந்து எண்ணினர்.

சென்னை மந்தவெளி ஆர்கே நகரை சேர்ந்த தேவதாஸ் (50), விஜயகாந்தின் தீவிர ரசிகர். தேமுதிக துவக்கப்பட்டதும் அக்கட்சியில் இணைந்தார்.

டிராவல்ஸ் ஏஜன்சி நடத்திவரும் இவர் நாடாளுமன்ற தேர்தலில் தேமுதிகவில் எப்படியும் சீட் வாங்கிவிட வேண்டும் என்பதில் மிகவும் உறுதியாக இருந்தார். தேர்தலில் வேட்புமனு தாக்கல் செய்யும் போது மற்றவர்களை விட வித்தியாசமாக செயல்பட்டு தொகுதியில் பிரபலமாக வேண்டும் என நினைத்தார்.

இதையடுத்து கடந்த மூன்று ஆண்டுகளாக 1 ரூபாய் நாணயங்களை சேர்க்க ஆரம்பித்தார். இந்நிலையில் தேமுதிகவில் இவருக்கு சீட் தரப்படவில்லை. இதனால் மனம் நொந்துபோன தேவதாஸ் சுயேட்சையாக போட்டியிட முடிவு செய்தார்.

தான் சேர்த்து வைத்த 10 ஆயிரம் 1 ரூபாய் நாணயங்களை 6 பித்தளை குடங்களில் வைத்து வீட்டில் யாகம் நடத்தினார். பின்னர் நேற்று அவர் அந்த குடங்களை தூக்கி கொண்டு தனது ஆதரவாளர்களுடன் கலெக்டர் அலுவலகத்துக்கு வந்தார்.

வேட்பாளர் ஒருவர் வைப்பு தொகை ரூ. 10 ஆயிரத்தையும் 1 ரூபாய் நாணயங்களாக கொண்டு வந்ததை அடுத்து தேர்தல் அதிகாரி அதிர்ச்சி அடைந்தனர்.

இதையடுத்து தேர்தல் அதிகாரிகள் 6 குடங்களில் இருந்த நாணயங்களையும் மேஜையில் கொட்டினர். அதை அங்கிருந்த தேர்தல் அதிகாரிகள் 6 பேர் சுமார் ஒன்றரை மணி நேரம் வரை எண்ணினார்கள். இறுதியில் அதில் 9850, 1 ரூபாய் நாணயங்கள் மட்டுமே இருந்தன.

இந்த தகவல் வேட்பாளரிடம் தெரிவிக்கப்பட்டது. அந்த நாணயங்கள் வரும் வழியில் கீழே விழுந்திருக்கலாம் எனக் கூறிய அவர் ரூ.150 செலுத்தி வேட்புமனு தாக்கல் செய்தார்.