தா.பாண்டியன் வேட்பு மனு நிறுத்தி வைப்பு - பரபரப்பு

சென்னை: வட சென்னை தொகுதியில் இந்திய கம்யூனிஸ்ட் கட்சி சார்பி்ல் போட்டியிடும், அக்கட்சியின் மாநிலச் செயலாளர் தா.பாண்டியனின் வேட்பு மனு நிறுத்தி வைக்கப்பட்டுள்ளது. இதனால் பரபரப்பு ஏற்பட்டுள்ளது.

அதிமுக கூட்டணியின் சார்பில் இந்திய கம்யூனிஸ்ட் கட்சி வேட்பாளராக தா.பாண்டியன் வட சென்னை தொகுதியில் போட்டியிட மனு தாக்கல் செய்துள்ளார். இங்கு திமுக சார்பில் டி.கே.எஸ். இளங்கோவன் போட்டியிடுகிறார்.

இன்று வேட்பு மனுக்கள் பரிசீலனை செய்யப்பட்டு வருகின்றன. இந்த நிலையில் தா.பாண்டியனின் வேட்பு மனு திடீரென நிறுத்தி வைக்கப்பட்டுள்ளது.

இன்று காலை வட சென்னை தொகுதி தேர்தல் அதிகாரியான மைதிலி ராஜேந்திரனிடம் திமுக வழக்கறிஞர் ஜோதி (அதிமுகவிலிருந்து சில மாதங்களுக்கு முன்பு திமுகவுக்குத் தாவியர்) ஒரு மனு ஒன்றைக் கொடுத்தார்.

அதில், தா.பாண்டியன் தனது வேட்பு மனுவில் முழுமையான சொத்து விவரங்களை தெரிவிக்கவில்லை. பூர்வீக சொத்துக்களை மட்டுமே குறிப்பிட்டுள்ளார். புதிதாக வாங்கிய சொத்து விவரங்களை தெரிவிக்கவில்லை.

எனவே, அவரது மனுவை பரிசீலனைக்கு எடுத்துக் கொள்ளக்கூடாது. உரிய நடவடிக்கை எடுக்க வேண்டும் என்று கூறப்பட்டிருந்தது.

இதையடுத்து தா.பாண்டியனின் வேட்பு மனு தற்காலிகமாக நிறுத்தி வைக்கப்படுவதாக மைதிலி ராஜேந்திரன் அறிவித்தார்.

இத்தகவல் தா.பாண்டியனுக்குப் பறந்தது. உடனடியாக அவர் கலெக்டர் அலுவலகத்துக்கு விரைந்து வந்தார்.

அவரிடம் தேர்தல் பார்வையாளர் சுனில்குமார், பாலி, சுக்லா ஆகியோர், மைதிலி ராஜேந்திரன் முன்னிலையில் விசாரணை நடத்தினார்கள். தா. பாண்டியன் விளக்கம் அளித்தார்.

தா.பாண்டியனின் வேட்பு மனுவை ஏற்பதா, நிராகரிப்பா என்பது குறித்து திங்கள்கிழமை முடிவு எடுக்கப்படும் என அதிகாரிகள் தெரிவித்துள்ளனர். எனவே தா.பாண்டியன் போட்டியிடுவாரா, இல்லையா என்பது கேள்விக்குறியாகியுள்ளது.

இந்த திடீர் திருப்பத்தால் பரபரப்பு ஏற்பட்டுள்ளது.